Алакөл ауданының тұрғыны Динара Әділбаева еттен жасалған өнімдер шығарады. Кәсіпкер келіншектің бұл іспен айналысып келе жатқанына 10 жылдан асты.
Талмай еңбектенгеннің арқасында бүгінде ауылдастары тарапынан ысталған қазы-қарта мен жал-жая, құйрық май сияқты өнімдерге сұраныс көп. Ерекше ықыласпен әзірленген тағамдарының дәмі тіл үйіреді. Сөйтіп, 2021 жылы бизнеспен шұғылдануға бел байлаған Динара Әділбаева жеке кәсіпкер ретінде тіркеліп, жұмысын жандандыруды ойлады. Шұжық өнімдерін дайындау технологиясын меңгере отырып, қосымша білім алуды да назардан тыс қалдырмай, еліміздің қалаларында қысқа мерзімді оқулардан да өтті.
Кәсіпкер келіншектің сөзінше, өнім жасауға қажет ет тікелей жергілікті шаруа қожалықтарынан сатып алынады. Алдағы уақытта сондай-ақ, өнім түрлерін кеңейтуді жоспарлап отыр. Динара Әділбаева «Бір ауыл – бір өнім» жәрмеңкесіне қатысып, тағамдарын көрмеге қойып, көпшілікке ұсынды. Нәтижесінде өнімдері қазылар алқасының көңілінен шығып, жоғары бағаланды. Осылайша ол жартылай финалға өтті. Ендігі кезекте өнімдері Бренд комитеті мүшелері алдында таныстырылмақ.
Ет тағамдары қазір облыстан тыс жерлерде де саудалануда. Өзге аймақ тұрғындары бұл туралы әлеуметтік желілер арқылы танысып, тапсырыс беруге мүмкіндіктері бар. Өнімдерге сұраныстың көбеюі кәсіпкердің ісін алға жылжытып, кеңейтуге ынталандырып отыр. Бүгінгі таңда ай сайын шамамен 300 келі шұжық пен басқа да ұлттық тағамдар сатылады. Кәсіпкердің цехында 4 адам жұмыс істейді, алдағы кезде олардың саны тағы өседі деп болжануда.
Айгүл Байжұмақызы
Алакөл ауданы
