«Атамекен» ҰКП төрағасы Райымбек Баталов Жетісу облысына іссапары кезінде Алакөл ауданына барды. Онда «Алакөл-Агро» ЖШС қызметіне ерекше қызығушылық танытты.
Жетісу облысы – өнеркәсіп өндіріс, АӨК дамытуға қолайлы жағдайы бар стратегиялық маңызы бар аймақ. Жетісу туризмді дамыту үшін жеткілікті табиғи ресурстары мол өлке, мал шаруашылығын өркендетуге де суы мен жемшөбі жеткілікті.
«Алакөл-Агро» кәсіпорны ауыл шаруашылығын өрістетуде табысы қомақты жетістігі жоғары. «Атамекен» ҰКП төрағасының орынбасары Ербол Есенеев, ет-май бағытындағы республикалық қой шаруашылығы палатасының басшысы Нұржан Жұмадиллаев, облыстық кәсіпкерлер палатасының төрағасы Дәурен Оңалбаев, Батыс Қазақстан облысының «Бірлік» ЖШС басшысы Серғазы Исембаев аталған серіктестіктің жұмысын көрді.
«Алакөл-Агро» – мал шаруашылығы саласы бойынша табысы тасыған кәсіпорындардың бірі саналады. Онда шамамен 45 мың бас қой-ешкі бар. Атап айтқанда, 28 мыңға жуық ұсақ малдың аналығы өсіріліп жатыр. Сондай-ақ, 580- ге жуық түйе бағылады. Фермада қойдың бірнеше тұқымы өсіріледі. Қоңыр және қара қошқар, аққарабас қошқары, қазақтың ірі қара жүнді тұқымымен шағылысқан – Еділбай, Блютексель, тексель тұқымымен шағылысқан – Катадин, Оңтүстік Қазақстан мериносымен шағылысқан – Дорпер, таза Дорпер тұқымды төлді осы жерден табуға болады.
Кездесуде Жетісу өлкесінің қой өсірушілері Ұлттық палата басшысына қой өсіруде қолданылатын заманауи технологиялар туралы айтты. Тиімді технологиялар қойшыларға өндірісте тиімділікке қол жеткізуге, еттің жоғары сапасын қамтамасыз етуге мүмкіндік беретіні жеткізілді. Сондай-ақ, қойдың асыл тұқымын көбейтіп, өнімділігін жетілдіру ісін арттыру мақсатында ғылыммен тығыз ынтымақтастықта жұмыс жүргізілетіні ерекше аталды.
– Қазақстанның тәуелсіздігі кезеңінде қой шаруашылығы 14 млн. басты жоғалтты. Егер 1990 жылы Қазақстанда қой мен ешкінің саны шамамен 35 млн. басты құраса, биыл мал басы шамамен 21 млн. басқа жетті, – деді «Алакөл агро» ЖШС басшысы Скендир Төреханов.
Сондай-ақ, ол бүгінде ірі бизнес қой шаруашылығына қаражат салуға мүдделі болып отырғанын, компания үшін қой шаруашылығы жаңа бағыт екенін, бірақ қазірдің өзінде бұл сала ұзақмерзімді перспективада тұрақты табыс көзі ретінде қарастырылатынын сөз етті.
Райымбек Баталов жұмыс сапары кезінде жайлауда жас мал отарын жасақтау үшін арнайы аппарат арқылы қозы-лақтарды енесінен ажырату үдерісін көрді. Бұған дейін күніне 1 мың қозыны ажырату мүмкін болса, қазір аппараттың көмегімен олардың санын 4 мыңға дейін көбейтуге болады.
– Жалпы, салаларды дамыту кешенді түрде жүргізілуі тиіс. Өндіріс үдерісін жетілдіру, қаржымен қамтамасыз ету, маман даярлау, техникамен жабдықтау, тиімділікті арттыру үшін жағдайлар қарастырылу керек. Бұл ретте мемлекет жаңа экспорттық нарықтарды ашып, тұрақты мемлекеттік саясат мәселелерін өз мойнына алуы тиіс. Біз өз кезегінде бизнеске оңтайлы және тиімді шешімдер дайындап, ұсынуға дайынбыз. Әр өңірде өз лидерлері бар, олардың тәжірибесін пайдалануымыз керек, – деді Райымбек Баталов.
Сондай-ақ, ол серіктестіктің ел экономикасын дамытудағы тәжірибесін әңгімелеп, өңірлік ерекшеліктерді ескере отырып, ауыл шаруашылығын дамыту қажеттігіне баса көңіл аударды.
Айгүл БАЙБОСЫНОВА
