Талдықорған қаласында есірткі заттарын таратып жүрген екі жасөспірім ұсталды, деп хабарлайды 7-su.kz желілік басылымы.
Қалалық полиция басқармасына тұрғын үйлердің бірінің жанында күдікті адамдардың жүргені жөнінде хабарлама келіп түскен. Оқиға орнына дереу патрульдік полиция жасағы жіберіліп, Ескелді ауданынан келген 17 және 18 жастағы екі жасөспірім ұсталды.
Тексеру барысында олардың Талдықорған аумағында есірткі таратумен айналысқаны белгілі болды. Жеке тінту кезінде біреуінен ақ түсті ұнтақ тәріздес заты бар екі зип-пакет табылып, ол мефедрон есірткісі деп танылды. Екінші күдіктіден дәл осындай зат салынған 95 зип-пакет тәркіленді.
Тергеу барысында ұсталғандар тыйым салынған заттарды жасырған орындарын көрсетті. Полицейлер қосымша 21 зип-пакет тауып, барлығы 116 орам есірткі затын тәркіледі.
Қазіргі уақытта тергеу амалдары жалғасып жатыр. Екі күдікті уақытша ұстау изоляторына қамауға алынды.
Полиция департаменті есірткінің заңсыз айналымы, оның ішінде жасырын қойып кету арқылы тарату – ауыр қылмыс екенін ескертеді. Мұндай әрекет үшін ҚР Қылмыстық кодексіне сәйкес, мүлкі тәркіленіп, 10 жылдан 15 жылға дейін бас бостандығынан айыру жазасы қарастырылған.
