Жетісу облысының орталығы Талдықорғанда әйнек сынықтарынан шыны талшығы өндірілуде. Аталған кәсіпорында шығарылған өнімдер бүгінде құрылыс саласында жоғары сұранысқа ие.
Мамандардың айтуынша, зауытта жиналған әйнек сынықтары ұсақталып, жуылған соң 1300 градустық ыстықта қыздырылады. Балқытылған шыны сүзгіден өткізілгеннен кейін арнайы қоспа қосылып үзілмейтін жіп өндіріледі. Құрылысқа аса қажетті бұл жіптің басты ерекшелігі шірімейді, отқа түссе де жанбайды. Бүгінде осы әйнек өңдейтін кәсіпорында 7 адам тұрақты жұмыспен қамтылған. Олар күніне 300 келі жіп шығарады. Шыныны турайтын және өзге де құрылғылар «Кәсіпкерлікті дамыту» бағдарламасы аясында берілген 5 млн теңгелік грантқа сатып алынған. Жалпы зауыт қоқысқа тасталған өнімдерді қайта өңдеп табыс тауып қана қоймай, экологияны жақсартуға да үлкен үлес қосуда.
– «Біздің кәсіпорында өндірілген бұл өнім құрылыс саласында кең қолданылады. Көбінде бетон және кірпіш сынды құймалардың арасына қосылып, тор тоқып, арматура әзірлеуге дейін пайдаланылады. Сонымен қатар экологиялық тұрғыдан да таза және тоқ өткізбейтін қасиеті бар. Сол үшін энергетика саласында да сұраныс жоғары. Бүгінде өнімге Алматы, Шымкент, Тараз қалаларындағы өндіріс орындары мен Ресей елінен тапсырыс көп түсуде», – дейді кәсіпорын директоры Данил Ким.
Жетісу облыстық кәсіпкерлік және индустриялық—инновациялық даму басқармасының бөлім басшысы Асхат Кәрібаевтың сөзінше, казір өндірісін өркендетем деушілер үшін үкіметтен қолдау көп. Жұмыс бастағанына 10 жылдан асқан бұл кәсіпорын әр мезгіл мемлекеттің қаржылай қолдауына ие болып келеді. Мәселен, биыл кәсіпкерлікті қолдауға республикалық бюджеттен 7 млрд теңгеден астам қаражат бөлінген. Осыған сай бүгінде облыста шағын және орта кәсіпкерлік нысандарының саны 60 мыңнан асқан. Олардың басым көпшілігі ауыл шаруашылығы, қызмет көрсету және өнім өңдеу саласында жұмыс істейді. Соның нәтижесінде аталған бизнес субъектілерінің өңірлік өнімдегі үлесі 33 пайызға жеткен.
– «Ал, биылғы жылдың 9 айының қорытындысы бойынша өңірде 369 жобаға қаржылық қолдау көрсетілген. Оның ішінде 249 жоба субсидияланса, 118 жобаға кепілдік қаржы берілді. Сонымен қатар жетіспейтін инфроқұрылымды жеткізу бойынша екі жоба 50 миллион теңгеден астам қолдау қаражатын алды», –дейді басқарма өкілі.
Айдын КӘЛІМХАН
