Талдықорған – Алматы бағытындағы күре жолының бойында бірнеше жылдан бері қаңырап тұрған «Береке» коттедж қалашығында құрылыс жұмыстары қайта жанданбақ.
Қалалық құрылыс бөлімінің мәліметінше, қалашықтағы үйлерді жаңғырту ісі кезең-кезеңімен қолға алынып 2025 жылдың соңына қарай толық аяқталады деп күтілуде.
Сала манандарының сөзінше, салынғанына бастағанына 10 жылға жуықтағанмен «Береке» коттедж қалашығындағы үйлердің құрылыс сапасы сын көтермей қаңтарылып тұрғанына да бірнеше жыл өткен. Нақтырақ айтқанда, ондағы үйлерді салу міндеті кезінде «ПМК-7К» жауапкершілік шектеулі серіктестігіне жүктелген. Алайда 2022 жылдың қыркүйек айында аталған мердігермен келісім-шарттар біржақты тәртіппен бұзылып, мемлекет қаражатын ұрлау фактісі бойынша жауапты адамдардың үстінен қылмыстық іс қозғалған. Көп өтпей қылмысқа қатысы бар адамдар анықтылып сот үкімімен тиісті жаза арқалаған. Содан бері сақалды құрылысқа айналған бұл үйлер қаңырап бос тұрған.
– «Көпке мәлім осыдан біраз жыл бұрын облыс орталығындағы «Береке» коттедж қалашығында несиелік және жалға берілетін үйлер салына бастаған болатын. Ондағы жалпы ауданы 18,6 мың м2 құрайтын 600-ге жуық тұрғын үйдің 373-і қолданысқа беріліп, 200-ден астамының құрылысы аяқталмай қалған. Осы мәселені оңтайлы шешу мақсатында жақында аяқсыз қалған жұмыстарға қайта есептеу жүргізіліп, ақау актісі жасалынып, жұмыстарды толық аяқтау үшін мердігерді анықтау бойынша конкурс жарияланған еді. Конкурс нәтижесі шыққан соң ағымдағы жылдың тамыз айының соңына құрылыс жұмыстары қайта басталмақ», – дейді құрылыс бөлімінің жауаптысы.
Айдын КӘЛІМХАН
