Талдықорғанда кәмелетке толмаған қызын өлтірді деп айыпталған ерлі-зайыптыларға сот үкімі шықты, деп хабарлайды 7-su.kz желілік басылымы El.kz сайтына сілтеме жасап.
Карина Дорохинаның денесі 2024 жылдың қаңтарында Текелі тауларынан зорлық-зомбылық белгілерімен табылған. Аса ауыр қылмыс жасады деген күдікпен полицейлер қыздың өгей әкесі мен анасын ұстаған болатын. Олар өз кінәсін толық мойындаған.
Сот тергеуі барысында сотталушылардың қылмысты 2023 жылдың күзі (қазан айының басынан қарашаға дейін) аралығында жасағаны анықталды. Ал баланы өлтіру қылмысы 6 қарашада орын алған.
М. (өгей әкесі – ред.) мен Е. (анасы – ред.) кінәсі куәгерлердің айғақтарымен, тергеу әрекеттерінің хаттамаларымен, сарапшылардың қорытындылары мен айғақтарымен, сондай-ақ қылмыстық істің басқа да материалдарымен толық дәлелденді. Сот шешімімен М. өмір бойына бас бостандығынан айырылып, ерекше қауіпсіздік мекемесінде жазасын өтейді, ал Е. 19 жылға бас бостандығынан айырылып, орташа қауіпсіздік мекемесінде жазасын өтейтін болды, – деп мәлімдеді Жетісу облыстық сотының баспасөз қызметінің жетекшісі Нұрсұлтан Орынбасаров.
Сондай-ақ, сотта кәмелетке толмаған марқұмның өкілі сотталғандардың біріне моральдық зиян ретінде 20 миллион теңге өндіріп алу туралы азаматтық талап қойғаны айтылды. Сот бұл талапты ішінара қанағаттандырып, 15 миллион теңге өндіріп алу туралы шешім шығарды.
Фото: instagram/taldykorgan_today
