Биылғы ауылшаруашылық қызметкерлері күнін талдықорғандық шаруалар толағай табыстармен қарсы алды. Нақтырақ айтқанда, 2024 жылдың 11 айында қала бойынша ауылшаруашылық саласында өндірілген өнім құны 45 млрд. теңгені құрап, өсім өткен жылмен салыстырғанда 3,4 пайызға жоғарылаған.
Жаңа жыл қарсаңында Талдықорған қаласының әкімі Ернат Бәзіл өңірдегі ауыл еңбеккерлерін кәсіби мерекесімен және жеткен жетістіктерімен құттықтап, жыл үздіктерін марапаттады.
– Биылғы жыл талдықорғандық шаруалар үшін аса табысты жыл болды. Бұл жалпы аймақтағы ауылшаруашылық саласында еңбек етіп жүрген мамандардың ортақ жетістігі. Қазір нарықта отандық өнімге деген сұраныс жоғары. Себебі, әр өнім табиғилығымен құнды. Осыған байланысты облыс орталығында жыл санап жергілікті өнім өндірушілердің саны артуда. Бұл ел экономикасының еселенуіне қосып отырған зор үлестеріңіз. Ал, қазір бұл саланы одан әрі дамытуға баса мән берілуде. Билік тарапынан қолдау бұдан былай да жалғаса беретін болады. Сондықтан сіздерге толағай табыс тілеймін, –деді шаһар басшысы.
Осыдан соң бірқатар адамдарға ауыл шаруашылығының дамуына қосқан үлестері үшін Жетісу облысы және Талдықорған қаласы әкімінің арнайы Алғыс хаты мен бағалы сыйлықтар табысталды.
Талдықорған қалалық ауылшаруашылық бөлімінің басшысы Абзал Секенұлының айтуынша, бүгінде Талдықорған қаласына қарасты 560-тан астам шаруа құрылымы бар. Олардың басым көпшілігі мал және егін шаруашылығымен шұғылданады. Ал, биылғы жылғы шаруалардың егін еккен жер көлемі 6 мың 200 гектарға жуық. Оған майлы және дәнді дақылдармен бірге бақша өнімдерін себіліп, мол өнім алынды. Сондай-ақ, 8 шаруа қожалығы 150 гектар жерге қант қызылшасын егіп, одан 7 мың тоннаға жуық өнім жинап, Ақсу және Көксу қант зауттарына өткізген. Жыл сайын мал саны да артуда. Мәселен, биыл аймақтағы мүйізді ірі қара мал саны 11 мыңға жуықтаса, 26 мыңнан астам қой, ешкі, бұған қоса 3700 басқа жуық жылқы, 50-ге тарта түйе бар. Осыған сай аймақта төрт түлік малға арналған арнайы жайылымдық және жем-шөп өсіретін шаппалық жерлер бар. Осы арқылы әр шаруашылық малын бағып, өнімін өндіріп, шаруасын дөңгелетуде.
Айдын КӘЛІМХАН
