Талдықорғанда №11, 14, 17 және 18 мектептерге жарылғыш зат қойылды деген анонимді хабарлама түсіп, оқушылар мен мұғалімдер дереу эвакуацияланды, – деп хабарлайды 7-su.kz ақпараттық порталы.
Облыстық полиция департаментінің мәліметінше, барлық нысан мұқият тексеріліп, күдікті заттар табылған жоқ. Қауіпсіздік шаралары аяқталғаннан кейін мектептер қалыпты жұмысын қайта жалғастырды.
Қазір жалған хабар таратқандарды анықтау үшін тергеу жүріп жатыр. Бұл — соңғы үш күнде тіркелген үшінші осындай жағдай.
Полиция әдейі терроризм актісі туралы жалған ақпарат бергендер қатаң қылмыстық жауапкершілікке тартылатынын ескертті.
Айта кетейік, бұған дейін Талдықорғанда вокзал, тұрғын үй және ірі сауда орталығы «бомба қойылды» деген жалған хабардың нысанасына айналған болатын.
