Талдықорған қаласындағы Жетісу облысының Қылмыстық істер жөніндегі мамандандырылған ауданаралық сотында Шерзат Болатты (Полатты) өлтіру ісіне қатысты сот процесі басталды. Айыпталушылар орнында тоғыз адам отыр, олардың бірі – кәмелетке толмаған.
Тергеу барысы туралы:
Алматы облысы Полиция департаменті бұл істің тергеуі аяқталғанын бұған дейін хабарлаған болатын. Тергеу аясында:
-
40 сот сараптамасы жүргізілді;
-
200-ге жуық куәгерден жауап алынды;
-
Оқиға орнында жауап алу, беттестіру және өзге де тергеу әрекеттері жүргізілді;
-
8 бейнематериал зерттеліп, қылмысқа қатысы бар адамдарға құқықтық баға берілді.
Қылмыстық іс 62 томнан тұрады.
Оқиғаның қысқаша мән-жайы:
2024 жылғы 4 қазанға қараған түні Талғар қаласында жасөспірім Шерзат Болат қаза тапты. Бұл оқиға қоғамда үлкен резонанс тудырды. Марқұмның туыстары қылмысқа қатысы бар барлық адамды жауапқа тартуды талап етті. Оқиға орнына ІІМ арнайы тобы жіберілді.
Қолданылған суық қару және полиция мәлімдемелері:
Полиция күдіктілердің жаппай төбелес кезінде қандай суық қару қолданғанын нақтылап, бұқаралық ақпарат құралдары мен халық арасында тараған «бандиттік топтардың қатысы» туралы мәліметтерге түсініктеме берді.
Қосымша жағдай:
2024 жылғы 12 қазанда Шерзат Болаттың үйі өртеніп кетті. Осы жағдайдан кейін марқұмның отбасы полиция қорғауына алынды.
«Жетісу-Ақпарат»
