Сала мамандарының сөзінше, құбырларды жаңалау жылыту маусымы кезінде туындайтын апатты жағдайлардың алдын алып, қала тұрғындарын үздіксіз жылумен қамтамасыз етуге бағытталған. Өткен жылы облыс орталығындағы Абай, Дарабоз ана, Қабанбай батыр және Балпық би көшелерінде жалпы ұзындығы 1,8 шақырымдық жылу желілері жаңартылған еді. Биыл құбыр жаңалау ісі тағы да жалғаспақ. Осыған сәйкес, қазір қаладағы Жансүгіров көшесіндегі жалпы ұзындығы 3,4 шақырым, кеңдігі 700м магистралды жылу желісін жаңғырту жобасы әзірленуде.
– Қала әкімі Ернат Бәзілдің тапсырмасына сәйкес, шаһарда жылу жүйелерін жаңғырту жұмыстары жүйелі түрде кезең-кезеңімен қолға алынуда. Бүгінде Талдықорған қаласын жылумен және ыстық сумен қамтып отырған 10 қазандық жұмыс ітейді. Ал ең үлкен «Басқуат» жылу қазандығының жүктемесін азайту үшін қосымша «Оңтүстік-Батыс» тұрғын ауданында тағы бір кварталдық қазандық салынуда. Қазір ондағы құрылыс жұмыстары қарқынды. Осының барлығы болашақта аймақтағы жылыту маусымы кезінде қаланы үздіксіз жылумен қамтуға мол мүмкіндік береді,– дейді әкімдік өкілі.
Еске сала кетсек, 2023 жылы Талдықорғандағы Гагарин, Алдабергенов, Қаблиса жырау, Жансүгіров және Қабанбай батыр көшелерінде жалпы ұзындығы 5 жарым шақырымға жуық жылу құбыры тегіс ауыстырылған болатын. Ал былтырға жылы шаһардағы Абай, Дарабоз ана, Қабанбай батыр мен Балпық би көшелеріндегі 1,8 шақырым жердегі құбыр салу ісі қолға алынып межелі мезгілде толық аяқталған. Биыл мұндай жұмыстар тағы жалғасады.
Айдын КӘЛІМХАН
