Осыдан 23 жыл бұрын құрылған «ТК Метакон» ЖШС «АСПМК-519» компаниялар тобына кіреді.
Талдықорған қаласындағы аталған серіктестік металл, құрылыс конструкциялары, электр желілеріне қажет материалдар өндіретін ірі кәсіпорын. Өндіріс орнында 0,35-тен 500 кВ-қа дейінгі кернеуге электр беру желілерінің анкерлік-бұрыштық, аралық, анкерлік тіректер, мобильді байланыс арналарына арналған антенна-діңгектер, темірбетон тірегі, болат конструкцияларындағы прожекторлық діңгектер, антенна тіректері, шиналық және сызықтық порталдар, электр беру желілеріне қажет металдар, қара, қою түсті бұйымдар шығарылады.
Металл бұйымдары мен конструкцияларды қорғау мақсатында тік пештерде ыстық мырыштау технологиясы бойынша коррозияға қарсы жабын қолданылады. Жоба субсидиялау құралымен «Басым жобаларды несиелеу және қаржылық лизинг тетігі» бағдарламасы шеңберінде «Даму» қорының қолдауына ие болды. Нәтижесінде өндіріс технологиясы толық ауыстырылып, ыстық мырыш цехы жаңартылды.
Сонымен бірге технологиялық жабдықтар сатып алынды. Өндіріс ошағында қазір 400-ге жуық адам еңбек етеді. Кәсіпорынның өндірістік базасының алып жатқан ауданы 9,62 гектар. Кәсіпорынның өндірістік қуаты жылына 20 мың тонна металл конструкцияларын шығаруға жетеді.
Айгүл Байжұмақызы
Талдықорған қаласы
