Мемлекет басшысы Қасым-Жомарт Тоқаев құқық қорғау органдарының кеңейтілген алқа мәжілісінде сөз сөйлеп, әділетті әрі қауіпсіз Қазақстанды құрудың негізгі қағидаттарын атап өтті. Президенттің айтуынша, елдің болашағы заң мен тәртіп үстемдігіне тікелей байланысты, деп хабарлайды 7-su.kz ақпарттық порталы Ақордаға сілтеме жасап.
«Заң және тәртіп» – ұлттың рухымен сабақтас ұғым
Президент өз сөзінде әділетті мемлекет құру жолында құқықтық мәдениетті көтерудің маңызын баса айтты.
«Әділетті әрі қауіпсіз Қазақстанды құру үшін заң мен тәртіп үстемдігін түбегейлі орнықтыру керек. Бұл – барша азаматтың мүддесін, құқығы мен бостандығын қорғаудың мызғымас тірегі», – деді Қасым-Жомарт Тоқаев.
Ол қоғамның құқықтық мәдениетін арттыру және құқық қорғау жүйесін жетілдіру – ауқымды әрі маңызды міндет екенін айтты.
Қазақ халқының құқықтық мұрасы – маңызды негіз
Мемлекет басшысы қазақ халқының ежелден құқыққа ерекше мән бергенін тілге тиек етті. Ол «Заң және тәртіп» қағидаты халқымыздың рухы мен дүниетанымына толық сәйкес келетінін атап өтті.
«Қазақ халқы қай заманда да заңға бас иген, дала заңын сақтаған халық. Бұл – біздің қанымызға сіңген қасиет», – деді Президент.
Ол түркі дәуірінен бастап Алтын Орда мен Қазақ хандығына дейінгі тарихи кезеңдерде қалыптасқан құқықтық жүйелерді ерекше атады. Қасым ханның «Қасқа жолы», Есім ханның «Ескі жолы», Әз Тәукенің «Жеті жарғысы» – Ұлы даланың төл конституциялары ретінде сипатталды.
«Атадан балаға жалғасқан бұл заңдар мемлекеттілік дәстүрін нығайта отырып, қоғамдық дамуға ерекше ықпал еткен. Ұлы далада еркіндік пен әділдік, ар-намыс пен адамгершілік, тілеулестік пен жауапкершілік бәрінен биік тұрған», – деді Тоқаев.
Құқықтық сананы арттыру – басты міндет
Президент халықтың құқықтық сана-сезімін дамыту үшін ұлттық құқықтық мұраны зерттеп, кеңінен насихаттау қажет екенін де атап өтті.
«Біз ата-бабамыздың бірегей құқықтық мұраларын мұқият зерделеп, жан-жақты насихаттауымыз керек. Бұл – халқымыздың құқықтық сана-сезімін арттыратын маңызды фактордың бірі», – деді Мемлекет басшысы.
