Президент Қасым-Жомарт Тоқаев мемлекеттік қызметте меритократия қағидатының басты орынға шыққанын және билікте «отбасылық жүйе» жоқ екенін мәлімдеді. Бұл туралы ол ұстаздардың Республикалық тамыз конференциясында айтты, деп хабарлайды 7-su.kz ақпараттық порталы.
Мемлекет басшысының сөзінше, азаматтарды қызметке тағайындау кезінде олардың білімі мен кәсіби білігі бірінші кезекте ескеріледі.
«Біз бір ел, бір халық болып, Әділетті, Таза әрі Қуатты Қазақстанды құрып жатырмыз. Ұлттың жаңа сапасын қалыптастыру үшін нақты реформаларды қолға алдық. Елдегі саяси жүйе толық жаңғырды, ұлттық экономиканың жаңа бағдары айқындалды. Қазір елімізде рухы азат, ойы еркін ұрпақ өсіп келеді. Заңды сыйлау, тәртіпке бағыну қоғамның мызғымас қағидасына айналуда», – деді Қасым-Жомарт Тоқаев.
Президент өзгерістерді орнықтыру үшін ең алдымен қоғам санасының түбегейлі жаңғыруы қажет екенін атап өтті. Осы ретте ол ұстаздарға зор жауапкершілік жүктелетінін, себебі «нағыз адал азамат» мектеп қабырғасында қалыптасатынын айтты.
