Биыл «Нұрлы жер» мемлекеттік бағдарламасы аясында Үштөбе қаласының орталығынан 30 пәтерлі тұрғын үйдің іргетасы қаланып жатыр. Қаратал аудандық құрылыс бөлімінің берген мәліметіне сүйенсек, Үштөбе қаласында 30 пәтерлі жалгерлік тұрғын үйдің құрылысын талдықорғандық «Шымыр» ЖШС жүргізуде.
Аталмыш мердігер компаниямен нысан құрылысын жүргізу үшін 388,8 млн. теңгеге келісімшарт жасалған. Тапсырыс беруші – «Қаратал аудандық құрылыс бөлімі» ММ. Құрылыс жұмыстары Ұлттық қор және облыстық бюджет арқылы қаржыландырылып отыр. Аталмыш нысан жобасын «Арлан» ЖШС жасаған. Наурыз айында басталған бес қабатты тұрғын үй құрылысының қарқыны жоғары. Қазіргі таңда үйдің іргетасы қаланып, жертөленің қабырғасы құйылып, бүгінде 49,7 млн. теңге игерілді. Үй аяқталған соң пәтерлер әлеуметтік аз қамтылған және көпбалалы отбасыларға беріледі.
– Құрылыс белгіленген кесте бойынша жүріп жатыр. Көпқабатты үйдің іргетасы мен жертөленің монолитін 15 адам құйып жатыр. Құрылысқа 2 техника жұмылдырылған. Бес қабатты жалгерлік үй монолитті, ортасы заманауи үлгідегі, жылуды жақсы ұстайтын газ блоктармен қаланады. Отыз пәтерлі үйде екі бөлмелі 10 пәтер, үш бөлмелі 20 пәтер болады. Жалпы, тұрғын үй көлемі 3095 шаршы метрді құрайды, – дейді учаске жетекшісі Бақытжан Чемербаев.
Құрылыс жұмысын басқарып жүрген Бақытжан Есей- ұлының бұл салада көпжылдық тәжірибесі бар. 1991 жылы Алматы қаласындағы құрылыс техникумын бітіргелі құрылыс саласында жұмыс істеп жүр. Жыл сайын бірнеше көпқабатты үйді жұртшылық игілігіне пайдалануға береді. Қаратал ауданында осымен екінші үйдің құрылысын жүргізіп жатыр. «Шымыр» ЖШС-нің құрылысшылары шетінен кәсіби шеберлер. Өз істерін жақсы біледі. Учаске жетекшісінің айтуынша, 15 адам монолит құйып болған соң жұмысшылар саны көбейеді. Яғни, нысанның бірінші қабаты көтерілген соң тас қалаушы, дәнекерлеуші, сантехник, сылақшы секілді мамандар іске кіріседі.
Құрылыс жұмыстарының сапасына авторлық және техникалық қадағалау мамандары бақылау жүргізеді. Аталған үйге орталықтандырылған жылу жүйесі, ауызсу құбыры, кәріз жүйесі, электр және телефон байланысы тартылады.
– Уақыт өткен сайын жұмысшылар саны көбеймесе, азаймайды. Біздің мекемеде жұмыс істейтін 20-дан аса тас қалаушы, 3 дәнекерлеуші, 5 сантехник мамандары құрылыс аяқталғанша еңбек етеді. Құрылыс жұмысын қазан айында аяқтауды жоспарлап отырмыз, – дейді Бақытжан Есейұлы.
Осылайша, ауданда 30 пәтерлі жалгерлік тұрғын үйдің құрылысы қарқынды жүріп жатыр. Күзде Үштөбе қаласында көпқабатты жаңа үй бой көтеріп, пәтер кезегінде тұрған тұрғындардың қуанышы еселенетін болады.
Асхат ӨМІРБАЕВ
Қаратал ауданы
