Облыс тұрғындарының басым бөлігі көгілдір отынмен қамтылған. Газдандыру Мемлекет басшысының тапсырмасына сәйкес жүзеге асырылуда.
Бүгінде аймақта «Жетісу облысын 2030 жылға дейін кешенді газдандыру» өңірлік кестесін іске асыру жалғасып жатыр. Бағдарлама аясында табиғи газға 358 елді мекеннің 192-сін қосу көзделген. Қазіргі таңда 84 елді мекен газдандырылды, бұл жоспарланған көрсеткіштің 58,2%-ын құрайды. Көгілдір отынға 400 мыңнан аса адам қол жеткізді. Бұл 101,8 мың абонент.
Биыл тағы 42 елді мекенді газға қосу жоспарланған. 45 жобаны іске асыруға республикалық және жергілікті бюджеттен 7,9 млрд. теңге бөлінді, оның ішінде 21 жоба 2024 жылдан өтпелі. Қазіргі уақытта біреуінен басқа барлық нысан аяқталды. Қоғалы ауылында 80 шақырым газ құбырының 35-і салынды.
ҚР Энергетика министрлігінің мәліметіне сүйенсек, 24 жаңа жобаны жүзеге асыруға 3,5 млрд. теңге бағытталған. Өңірде қосымша 18 бағыт бойынша құрылысты бастау жоспарланған. Оған 15,9 млрд. теңге керек. Аталған министрлік бюджетке 25,6 млрд. теңге бөлуге өтінім берген. Бұл сома басталған жобаларды аяқтауға және жаңа жобаларды іске қосуға қажет.
Барлық іс-шара нәтижесінде облысты газдандыру деңгейі 71,4%-ға жетеді. Бұл 126 елді мекенді және аймақтың 500 мыңнан аса тұрғынын табиғи газбен қамтамасыз етуге ықпалын тигізеді. Негізгі жоспарларға қосымша қолданыстағы өңірлік кестеге кірмейтін 22 елді мекен бойынша жобалық ізденістер жалғасуда. Бұл болашақта газ инфрақұрылымын одан әрі кеңейтуге мүмкіндік береді.
Жалпы, ҚР Энергетика министрлігінің деректеріне сәйкес 2022-2024 жылдар аралығында бүкіл ел бойынша газдандыруға 371,1 млрд. теңге бағытталып, 14 мың шақырымнан аса газ құбыры салынған. Осы кезеңде Қазақстанды газдандыру деңгейі 11-ден 12,6 млн. адамға дейін өскен. Бұл ел халқының 62,4%-ын құрайды.
Айгүл БАЙБОСЫНОВА
