Әрбір шәкірт үшін ұстаздың орны ерекше. Бұл орайда мен оқушыларына сапалы білім, саналы тәрбие беріп келген ардақты жан туралы сөз қозғамақпын. Ұлағат иесі болып саналы ғұмырын өткерген, биыл зейнетке шыққан Қарлығаш Жакуова есімді ұстазым мен үшін ерекше жан.
Иә, Қарлығаш апайым Жетісу өңіріндегі білім саласына елеулі үлес қосқан, өмірін шәкірт тәрбиесіне арнаған білікті маман. Ол кісі І. Жансүгіров атындағы Талдықорған педагогикалық институтын 1985 жылы физика пәнінің мұғалімі мамандығы бойынша аяқтап, сол жылы еңбек жолын М. Төлебаев атындағы орта мектептен бастаған. Содан бергі 40 жылда Қарлығаш апай ұрпақ тәрбиесі мен біліміне ерекше үлес қосты.
Мамандығына шын берілген тәжірибесі мол, әдістемелік шеберлігі жоғары ұстаз екенін дәлелдеген ұстазым физика пәнін оқытуда оқушылардың қызығушылығын арттырып, олардың ғылыми танымдық көзқарасын қалыптастыру жолында үздіксіз ізденіс үстінде болды. Шәкірттері жыл сайын пән олимпиадаларында, ғылыми байқауларда жоғары жетістіктерге жетіп ұстаз еңбегінің нәтижесін көрсетіп келеді.
Ұлағат иесінің жылдар бойғы жемісті еңбегі лайықты бағаланып, түрлі марапат иеленді. Атап айтсақ, 2019 жылы ҚР Білім және ғылым министрінің Алғыс хатына ие болса, 2020 жылы «Ы. Алтынсарин» төсбелгісімен марапатталады.
Ал былтыр алған «Еңбек ардагері» төсбелгісі оның ұстаздық жолдағы қажырлы еңбегінің шынайы көрінісі деп білемін.
Қарлығаш Арғынғазықызы – ұстаздық қызметтің биік белестерін абыроймен өткеріп, бүгінде құрметті еңбек демалысына шықты. Десе де ұлағат иесінің жарқын ізі, оның есімі шәкірттерінің жүрегінде, әріптестерінің жадында алтын әріппен жазылып қалары сөзсіз.
Айзере ТАЛҒАТҚЫЗЫ,
М. Төлебаев атындағы орта мектебінің 8-сынып оқушысы
Жайпақ ауылы,
Алакөл ауданы
