Қазақстан Республикасы Цифрлық даму, инновациялар және аэроғарыш өнеркәсібі бірінші вице-министрі Қаныш Төлеушин жұмыс сапарымен Талдықорған қаласына келіп, жергілікті тұрғындармен кездесу өткізді.
Халықпен басқосу Жетісу облысының цифрлық технологиялар басқармасы және Қазақстан Республикасы Цифрлық даму, инновациялар және аэроғарыш өнеркәсібі министрлігінің ұйымдастыруымен өтті. Аталған шараға министрлік комитеттерінің өкілдері, Цифрлық үкіметті қолдау орталығы және облыс басшылығы қатысты.
Айта кетейік, Қазақстанның болашаққа нық сенімді түрде көшуі үшін бүгінде IT-саласын белсенді дамыту қажет. Бұған ықпал ететін жетекші алаңдардың бірі Жетісу жерінде қарқынды дамып келе жатқан «Jetisu Digital» IT-хабы. Бұл жай ғана оқу орталығы емес, цифрлық дағдыларды үйренуге, стартаптарды бастауға және IT индустриясына енуге арналған кеңістік.
Осы ретте Қаныш Аманбайұлы «Jetisu Digital» өңірлік IT-хабының ғимаратына бас сұғып, қызметімен танысты. Жастардың жұмысымен танысу кезінде жас өнертапқыштардың робототехникасын көріп, оң көзқарасын білдірді. Өйткені, бұл жерде технология саласына ден қойған жастар білім алып, сан түрлі жоба мен бағдарлама жасайды. Игі бастама Мемлекет басшысының тапсырмасы негізінде жүзеге асты. Сондай-ақ, жастар мен балалар сайт жасауды, мобильді қосымша дайындауды үйренеді. Білімгерлерге халықаралық деңгейдегі мамандар сабақ береді. Әрі стартап идеяларды жүзеге асыруға жан-жақты қолдау көрсетіледі.
Байқағанымыздай, бұл салаға өскелең ұрпақтың қызығушылығы жоғары. Қазірдің өзінде мектеп оқушылары темірлерден құрастырған заттарын байқауларға ұсынып, бірнеше жеңіс биігінен көріне білген. Хаб ашылған сәттен бастап бұл жерде жүзден аса іс-шара ұйымдастырылып, оған мыңнан аса адам қатысқан. Сонымен бірге білім беру бағдарламалары аясында 2 мыңнан аса оқушы білімін жетілдіріп, ой-өрісін дамытқан. Осылайша «Jetisu Digital» өңірлік IT-хабы цифрлық бастамалар мен стартаптардың, жастардың ІТ жобаларының орталығына айналған.
Бұдан соң жұртшылықпен кездесу өтіп, талап-тілектерге құлақ асылды. Жиналғандар алдында сөз сөйлеген Қаныш Аманбайұлы цифрландыру саласында атқарылып жатқан жұмыстармен таныстырды. Оның айтуынша, қазіргі уақытта елде IT мамандарына сұраныс артып келеді. Ол үшін Хаб IT саласында білікті кадрларды даярлауға бағытталған «Tech Orda» бағдарламасы әзірленген. Бұл бағдарлама 18 бен 45 жас аралығындағы Қазақстанның барлық азаматына ІТ-мамандығын тегін алуға мүмкіндік береді. Сондай-ақ, маман дайындау уақыты 1 немесе 2 жыл емес, шамамен 4-6 ай болады. Қазіргі таңда осы бағдарлама бойынша 73 IT мектеп 178 курс бойынша оқыту жүргізіледі.
Сонымен қатар, биыл елімізде алғашқы жасанды интеллект бойынша Tomorrow school мектебі ашылған. Оқуға 9800-ден аса өтініш түсіп, қазіргі таңда 176 студент негізгі оқуда білім алуда.
Бүгінде облыстың барлық 315 мектебі интернетке қосылған. Бұл білім сапасын арттырудағы маңызды қадам. Барлығы 350 ауылдық елді мекеннің (АЕМ) 95,4%-ы интернетке қосылған. Оның ішінде 176 АЕМ талшықты-оптикалық байланыс желісімен (ТОБЖ), 307 АЕМ мобильді интернетпен қамтылған.
Талдықорған қаласында 5G желісі іске қосылды, бүгінде 29 базалық станция орнатылған. Биыл 20 ауылдық елді мекенге ТОБЖ тарту жоспарлануда. Сонымен қатар, Beeline операторы 10 АЕМ-де интернет сапасын арттыру бағытында жұмыс жүргізуде. 5G желісін одан әрі дамыту аясында Талдықорғанда 19 жаңа базалық станция орнату көзделіп отыр. Облыс аумағында 41 891 бейнебақылау камерасы жұмыс істейді. Биыл 307 камера орнату жоспарланған, оның ішінде 87 камера жаңа буын интеллектуалды мүмкіндіктерімен жабдықталмақ.
Сөз соңында бірінші вице-министр Жетісу облысы цифрлық даму, қауіпсіздік және білім беру салаларында айтарлықтай нәтижелерге қол жеткізгенін, алдағы кезеңде интернет сапасын арттыру, заманауи технологияларды кеңінен енгізу, халыққа көрсетілетін қызметтердің сапасын одан әрі жетілдіру бағытында жүйелі жұмыс жалғасатынын жеткізді.
Өз кезегінде телекоммуникациялар комитеті төрағасының орынбасары Лазизбек Қайнарбекұлы, Мемлекеттік көрсетілетін қызметтер комитеті төрағасының орынбасары Надир Шамуратұлының баяндамалары тыңдалды. Бұдан соң аталған министрліктің құзыретіне кіретін бағыттар бойынша сұрақтар қойылып, жауаптар берілді. Мәселен, көпшілік цифрландыру мен мемлекеттік қызметтер, байланыс, ақпараттық қауіпсіздік, инновациялар, электрондық және аэроғарыш өнеркәсібі, жасанды интеллект жайында сауалдарын жолдады.
Сондай-ақ, цифрландыру саласы бойынша алға қойылған міндеттерді орындау үшін Талдықорған қаласына әлеуетті инвесторлар тартуға министрлік тарапынан қолдау көрсетілсе деген тілектер де айтылды. Сұрақтың көбі жастар тарапынан қойылды. Жиналғандардың сұрағына құлақ асқан Қаныш Аманбайұлы көтерілген мәселенің бәрі жауапсыз қалмайтынын және оны шешу үшін тиісті шаралар қолданылатынын айтты. Соңында халықпен жеке қабылдау өткізіліп, мәселелеріне ден қойылды.
Айгүл Байбосынова
