Арнайы іссапармен Жетісу облысына келген Қазақстан халқы Ассамблеясы төрағасының орынбасары Марат Әзілханов этномәдени бірлестік төрағалары және Қазақстан халқы Ассамблея мүшелерімен кездесу өткізді. Салтанат сарайында өткен жиынды облыс әкімінің орынбасары Рустам Әли жүргізіп отырды.
«Дөңгелек үстел» форматында өткен шарада ақсақалдар кеңесінің қызметі, жалақыны көтеру, әлеуметтік мәселелер талқыланды. Басқосу барысында Рустам Әли:
– Облыста 30 этномәдени орталық тұрақты жұмыс істейді. Жетісу жеріндегі өзге ұлт өкілдері этномәдени орталықтардың маңайына топтасып, өздерінің мәдениеті мен салт-дәстүрін дамытып отыр. Қазақстан халқы Ассамблеясы – бірлігімізді нығайтатын бірегей құрылым. Ассамблея қасиетті қазақ жерін мекен еткен барша этносты ұйыстырып отыр. Онда еңбек етіп жүрген азаматтарды бірліктің елшісі деуге болады. Баршаңыз осы маңызды жұмысты абыроймен атқара бересіздер деп сенемін, – деді.
Осыдан кейін облыстық аналар кеңесінің төрағасы Несіпжамал Баймадиева, Текелі қалалық орыс этномәдени орталығының төрағасы Константин Нестеров, облыстық корей этномәдени орталығының өкілі Владимир Ли облысымызда атқарылып жатқан шараларды баяндады.
Шараға жиылған этномәдени бірлестік төрағалары көкейлерінде жүрген сұрақтарын қойып, тұшымды жауап алды. Әсіресе, қазақ тілін өзге ұлт өкілдеріне оқыту мәселесі қызу талқыланды. Этномәдени бірлестік төрағалары аймақта ағылшын тілін үйрететін орталықтар көп, қазақ тілін тегін оқытатын мекеме жоқтың қасы екенін жеткізді. Сонымен қатар, мектептен сағат, Үкіметтен гранттар бөлінсе деген ұсыныс білдірді.
Марат Алмасұлы еліміздегі қоғамдық-саяси тұрақтылықты қамтамасыз етуде мемлекеттік саясаттың басым бағыттарына кеңінен тоқталып, басқосуда көтерілген мәселелер талқыланып, қаралатынын айтты.
Айдар НАЗАРҰЛЫ
