2024 жылдың қаңтар-мамыр айларының аралығында «Бірыңғай жинақтаушы зейнетақы қоры» АҚ халыққа 24,0 миллионнан астам қызмет көрсетті.
Қызметтердің жалпы санының 9,7 миллионнан астамы электрондық форматта көрсетілсе, 13,5 миллион қызмет автоматты түрде, ал шамамен 0,3 миллионы қашықтан жүзеге асырылды. Күндізгі форматта 492 мыңнан астам қызмет көрсетіліп, оның ішінде тікелей Қордың кеңселерінде 471 мыңға жуық қызмет ұсынылды.
Автоматты режимде көрсетілетін қызметтер санының күн санап өсіп жатқанын ерекше атап өткен жөн. Әсіресе, нысаналы талаптарға қатысушылар үшін шоттар мен карта ашу өсімі 2024 жылғы 1 қаңтардан бастап Қазақстанда жұмыс берушінің міндетті зейнетақы жарнасын енгізуге, сондай-ақ, «Ұлттық қор – балаларға» бағдарламасы шеңберінде төлемдерді есепке алу және есептеу бойынша БЖЗҚ-ның қызмет ауқымын кеңейтуге байланысты болды. Естеріңізге сала кетейік, барлық зейнетақы шоттары БЖЗҚ-ға алғашқы жарна түскен кезде автоматты түрде ашылады. «Ұлттық қор – балаларға» бағдарламасының қатысушыларына нысаналы талаптар мен нысаналы жинақтар автоматты түрде есептеледі. Қызметтердің көп түрі, оның ішінде, шоттарды автоматты түрде ашу, кәмелетке толмаған азаматтарға нысаналы талаптарды есептеу және ЖМЗЖ сомаларын есепке алу БЖЗҚ-ның мемлекеттік органдардың дерекқорларымен интеграциялануының арқасында мүмкін болып отыр.
Есепті кезең ішінде шартты зейнетақы шоттарын және нысаналы жинақтау шоттарын қоса алғанда, зейнетақы жарналарының барлық түрі бойынша ашылған жеке зейнетақы шоттарының жалпы саны 4,2 миллион бірліктен асты.
Жеке зейнетақы шотынан, шартты зейнетақы шотынан, сондай-ақ, нысаналы жинақтау шотынан үзінді көшірме алу әлі де ең танымал қызмет қатарында. Жыл басынан бері ЖЗШ, ШЗШ, НЖШ-дан 11,0 миллионнан астам үзінді көшірме берілді. Оның ішінде 8,7 миллион үзінді көшірме электронды түрде және шамамен 2 млн. автоматты режимде рәсімделді.
БЖЗҚ АҚ баспасөз орталығы
Фото: gov.kz
