Талдықорған туристер арасында танымал бола бастады. Осы жылдың тоғыз айында шаһарға 60 мыңға жуық адам келген, оның 1285-і шетелдік қонақ.
Қазақстандағы туризм тек көрші елдерден ғана емес, әлемнің басқа жерлерінен де саяхатшыларды тарта отырып, жоғары қарқынмен даму үстінде. Жетісу жерінің инфрақұрылымын жаңғырту алыстан ат терлетіп келетін қонақтардың көбеюіне жол ашуда.
Талдықорған туристерді көрікті жерлердің байлығымен қызықтырады. Мәселен, олардың қатарында «Қызылтас-Тасбақа» петроглифтері, Ілияс Жансүгіров атындағы мұражай және Мұхамеджан Тынышбаев тарихи-өлкетану мұражайы сияқты бірегей тарихи және мәдени нысандар бар. Бұл орындар Қазақстан тұрғындары арасында да танымал.
Талдықорған ірі көлік магистралінде стратегиялық орналасуына қарай Жетісудағы «қақпа» деп аталады. Қала арқылы аймаққа баратын көптеген саяхатшы бар. Биылғы қаңтар-қыргүйек айлары аралығында Талдықорғанда туристік қызметтерден түскен табыс 713,4 миллион теңгені құраған. Бұл туризмнің аймақ экономикасы үшін маңыздылығын көрсетеді.
Айгүл Байжұмақызы
Талдықорған қаласы
