Иран Қазақстанға егіс алқаптарын суарудың заманауи технологияларын ұсынуға дайын.
ҚР Су ресурстары және ирригация министрі Нұржан Нұржігітов Иранның Қазақстандағы Төтенше және Өкілетті елшісі Әли Акбар Джоукармен кездесті. Тараптар егіс алқаптарын суару және суармалы суды тасымалдау кезінде су шығынын азайту үшін тәжірибе және технологиялар алмасу мәселесін талқылады.
Атап айтқанда, ирандық компаниялар Қазақстанға жерасты суларын пайдаланатын заманауи суару жүйелерін, сондай-ақ, суды өсімдіктердің тамырына тікелей жеткізетін тамшылатып суарудың автоматты қондырғыларын ұсынуға дайын. Осы технологиялардың нәтижесінде Иран күріш өсіруге жұмсалатын су шығынын едәуір азайтып, өнімділікті арттырған.
Нұржан Молдиярұлының айтуынша, бүгінде су қоймалары мен басқа да су шаруашылығы құрылыстарын салу және қайта жаңғырту бойынша ауқымды жұмыс- тар жүргізілуде. Иран компанияларының осы бағытта үлкен тәжірибесі бар және тиімді технологияларды дамытып жатыр. Олардың кейбірі елімізде жұмыс істеуде.
Мәселен, Жамбыл және Түркістан облыстарында ирригациялық желілерді қайта жаңғырту жұмысы жүзеге асырылуда. Сондықтан ирандық кәсіпкерлерді су инфрақұрылымын салу мен жөндеуге арналған байқауларға қатысу үшін елге шақыру көзделіп отыр.
Айгүл Байжұмақызы
