Талдықорған қаласында волонтерлар слеті өтті.
Жиналған қауым алдында сөз алған қала әкімінің орынбасары Жеңіс Андабеков қоршаған ортаны қорғау мен табиғи апат кезінде жапа шеккендерге көмек көрсету барысында белсенділік танытқан барша азаматтарға шынайы алғыс білдіріп, үздік еріктілерге арнайы марапат табыстады.
Жеңіс Саятбекұлының айтуынша, еліміздегі еріктілер жеке тұлғалар, кәсіпорын-компаниялар әлеуметтік осал топтарға көмек көрсетіп, қоршаған ортаны қорғап, азаматтық ұстанымды берік қалыптастырған. Сондай-ақ олар әлеуметтік жауапкершілікті сезініп, өздігінен ұйымдасып, өзара жәрдем ету және қоғамда қайырымдылық жасаумен айналысады.
– «ҚР Президенті Қ.Тоқаев: «Мен, Президент ретінде әрқашан волонтерлардың қозғалысын қолдаймын. Еріктілер — жаны таза адамдар. Олар — елдің шынайы патриоты, сол үшін де құрметім шексіз. Белсенді азаматтық ұстанымдарыңыз мемлекеттің дамуына айтарлықтай септігін тигізетіні сөзсіз», – деген еді. Бүгінде Талдықорған қаласында 15 ұйымға біріккен 500-ден аса ерікті бар. Бұл азаматтардың түрлі қайырымдылық шараларына атсалысып, көпке қол ұшын беруде сіңірген еңбегі зор. Сондықтан олардың әрбірі қандай да бір марапатқа әбден лайық», — деді қала әкімінің орынбасары.
Айдын КӘЛІМХАН
