Талдықорған қаласындағы Назарбаев Зияткерлік мектебінде Кеңес Одағының Батыры Әлия Молдағұлованың 100 жылдығына орай мектепаралық «Үздік командир» атты әскери-патриоттық байқау өтті.
Бәсекеге NIS оқушылары мен Талдықорған дарынды балаларға арналған «Білім-инновация» мамандандырылған лицей-интернатының оқушы командирлері түсті.
Байқау үш кезең бойынша өткізілді: «Білекті бірді жығар, білімді мыңды жығар» – сұрақтарға-жауап, «Автоматты жартылай бөлшектеу және жинау реті», «Күш атасын танымас» – кеудені жерден көтеру (отжимание, қыздарға пресс).
Қатысушыларға әділ баға беріп, олардың көрсеткіштерін бағалаған әділқазылар алқасында 54380 әскери бөлімнің сержанты, 2-сыныпты сержант Қайрат Бауыржанұлы, Жетісу гарнизоны баспасөз қызметінің сержанты Еламан Жоламанұлы болды.
«Үздік командир – 2025» бас жүлдесіне «Bilim — Innovation» лицейінің жоғары сынып оқушысы Айдос Омар ие болса, 1-ші орынды Назарбаев Зияткерлік мектебінің жоғары сынып оқушысы Аяулым Әлиева алды, 2-ші орынды Назарбаев Зияткерлік мектебінің оқушысы Мырзабек Құрақбай иемденсе, 3-ші орынды Назарбаев Зияткерлік мектебінің оқушысы Әмір Ермұханбетов пен «Bilim — Innovation» лицейінің оқушысы Ұлан Мырзабек бөлісті. Жүлделі орын алған оқушылар бағалы сыйлыққа ие болып, дипломдармен марапатталды.
«Жетісу-Ақпарат»
