Қазақстандағы Бірыңғай жинақтаушы зейнетақы қорының (БЖЗҚ) зейнетақы активтері 2025 жылғы тамыздағы мәлімет бойынша 23,5 трлн теңгеге жетті, деп хабарлайды 7-su.kz ақпараттық порталы.
Портфель құрылымында теңгемен номинацияланған қаржы құралдарының үлесі – 58,3%, ал шетел валютасымен номинирленген активтердің үлесі – 41,7%.
Ұлттық банк дерегінше, инвестициялардың негізгі бөлігі – Қазақстан Республикасы Қаржы министрлігі шығарған мемлекеттік бағалы қағаздар (ҚР МБҚ). Олардың үлесі 43,7% немесе 10,3 трлн теңге.
Инвестиция құрылымы:
-
ҚР МБҚ – ең сенімді және өтімді қаржы құралдары;
-
Квазимемлекеттік сектор мен банк секторының қаржы құралдары;
-
Шетелдік нарықтағы инвестициялар (АҚШ мемлекеттік облигациялары, дамушы елдер облигациялары, инвестициялық деңгейдегі корпоративтік облигациялар, акциялар).
«Бәйтерек» және «Самұрық-Қазына» облигацияларына инвестиция – 651 млрд теңге:
-
Көлік инфрақұрылымы – 173 млрд тг, жылдық кірістілік 13%, мерзімі 15 жыл;
-
Агроөнеркәсіптік кешен – 388 млрд тг, кірістілік 15,9%, мерзімі 1–5 жыл;
-
Энергетика – 90 млрд тг, инфляцияға индекстелген мөлшерлеме, мерзімі 15 жыл.
Ұлттық банк облигациялар нарықтық шарттарға сәйкес орналастырылып, қаражат мемлекеттік комиссия мақұлдаған салаларға бағытталатынын атап өтті.
Инвестициялық табыс қалай қалыптасады?
Зейнетақы жинақтары әртүрлі валюталар, елдер мен секторлар бойынша акцияларға, облигацияларға, депозиттерге және басқа да құралдарға салынады. Инвестициялық табыс пайыздық сыйақы, дивидендтер және актив құнының өсуі есебінен қалыптасады.
Бұл табыс тұрақты көрсеткіш емес және нарықтық құн, валюталық бағам, инфляция сияқты факторларға байланысты өзгеруі мүмкін. №49 Есепке алу қағидаларына сәйкес, зейнетақы жинақтары апта сайын және ай сайын қайта есептеледі.
