Мемлекет басшысы Қасым-Жомарт Тоқаев Көлік министрі Нұрлан Сауранбаевты қабылдады. Кездесу барысында Қазақстанның көлік-транзит әлеуетін дамытуға бағытталған нақты шаралар талқыланды.
Президент еліміздің аумағы арқылы өтетін жүк тасымалы көлемін арттыру үшін автомобиль жолдары мен авиациялық хабтар желісін қарқынды дамыту қажеттігін атап өтті. Сонымен қатар, теміржол инфрақұрылымына қатысты ірі жобаларды уақытылы әрі сапалы іске асырудың маңыздылығына ерекше тоқталды.
Көлік-логистика саласының ішкі жалпы өнімдегі үлесін ұлғайту мақсатында Қасым-Жомарт Тоқаев министрге саланы тежеп тұрған негізгі кедергілерді анықтап, оны дамытудың жаңа тәсілдерін ұсынуды тапсырды.
Сондай-ақ Мемлекет басшысы Қазақстанның Еуразия құрлығындағы негізгі сауда-логистикалық торап ретіндегі рөлін күшейту үшін көлік дәліздерінің өткізу қабілетін арттыру және осы бағытта жан-жақты әрі тиімді шаралар қабылдау қажеттігін атап өтті.
