Облыс әкімі Бейбіт Исабаев Жаркент өңіріне арнайы іссапармен келіп, әлеуметтік нысандар мен өндіріс орындарын аралап, ауданның әлеуметтік-экономикалық даму үрдістерін бағамдады.
Облыс басшысы өңірдегі ауылдық округтердің белсенділігінің төмен екенін сынға алды. Округ әкімдеріне халық арасында жобаның мүмкіндіктерін кеңінен түсіндіру, насихаттау керегін ескертті.
– Жаркенттің жеріне бәрі өседі. Өңірде алма өсіріп отырған шаруашылықтар бар, енді тек алманың өзін саудаламай, оны сақтайтын қойма салып, жергілікті жеміс өнімдерінен табиғи шырын әзірлеуді қолға алу керек. «Ауыл аманаты» – ауылдық жерлерде 3 — 4 отбасы бірігіп, елді мекенге керек осындай кәсіптерді ашуға өте қолайлы жоба. Ауылға басқа тағы не керек – наубайхана бола ма, шұжық цехы ма, шаштараз ба, өзара ақылдасып, керек кәсіпті ашып, бастасаңыздар. Сонда өз отбасыларыңызды жеткілікті деңгейде асырауға да, ауылдастарыңызға жұмыс тауып беруге де мүмкіндіктеріңіз болады. Бұл пилоттық жоба ретінде Жамбыл облысында өзінің жақсы нәтижесін көрсетті. Сондықтан жетісулықтар да жобаның игілігін көруі тиіс. Ол үшін, ауыл әкімдері халықпен жұмыс істеңіздер, жоба туралы егжей-тегжейлі түсіндіріңіздер, – деді Бейбіт Өксікбайұлы.
Нұркент ауылындағы төрт 60 пәтерлік және екі 80 пәтерлік тұрғын үйдің құрылысы да назардан тыс қалған жоқ. Осыдан екі-үш жыл бұрын салынып біткен бұл көпқабатты үйлердің инженерлік коммуникациясы әуел баста дұрыс жоспарланбағандықтан, осы кезге дейін дайын үйді қолданысқа беру мүмкін болмаған. Облыс әкімі кәріз жүйесі, жылу жүйесі, электр желісі, кіреберіс жолдарға қатысты жобаларға тиісті қаражат қарастырылуына қолдау көрсетіп, мәселе шешімін табатын болды. Осылайша биыл осы тұрғын үйлер пайдалануға беріліп, кезекте тұрған 400 отбасы үй алады. Жалпы қазір ауданда 4 300-ден астам адам тұрғын үй кезегінде тұр.
Мырзағали НҰРСЕЙІТ
Суретті түсірген Жеңіс ЫСҚАБАЙ
