Ақши мен Көктұма ауылдарындағы демалыс аймақтарында жарықтың жайы алаңдатарлық мәселе. Әсіресе, электр қуатының жетіспеушілігі шомылу маусымы басталғанда сезіледі екен. Ресми ақпаратқа сүйенсек, тоқтың тұрақты болмауынан өңірде 150-ден астам тұрмыстық техника істен шығыпты.
Ауыл мен демалыс аймақтарын толық жарықпен қамту үшін Бескөлден бастап Ақши ауылына 35 кВт-тық электр желісі тартылып, 56 шақырым «АС – 95» кабелі жүргізіліпті. Сонымен қатар, қуаттылығы 12,6 МВТ-ны құрайтын 2 күштік қосалқы трансформатор орнатылған. Ақши ауылындағы электр жүйесі нысанының құрылысы аяқталып, пайдалануға берілді. Жалпы ұзындығы 67 шақырым электр желісі және 28 трансформатор салынды. Былтырдан бастап жоба құны 10,2 млрд. теңге құрайтын Ақши – Бескөл 110 кВт-тық нысанның құрылысы басталды. Мұнда қызу жұмыс жүруде. Мердігер компания өкілдерінің айтуынша, құрылыс жыл соңына дейін аяқталмақ.
– 2024 жылдың қыркүйек айынан бастап Бескөл мен Ақши ауылдарының арасында электр желісінің құрылыс жұмыстары жүргізілуде. Жұмыс аяқталса Ақши мен Көктұмадағы демалыс аймақтары толыққанды жарықпен қамтылады, – дейді аудан әкімінің орынбасары Қуандық Мұхаметқалиев.
Сонымен қатар, Ақтоғай – Көктұма 220 кВт-тық электр желісінің құрылысы нысанына жобалық-сметалық құжаттама әзірленіп, сараптамадан өткізілуде.
Жайдарман жаңалықты естіген тұрғындардың да қуанышында шек жоқ.
– Ауылда демалыс орны көп. Сондықтан жаз айында жарық болмай қалады. Жарық жиі сөнгендіктен наубайханамдағы пештер күйіп кеткен кездер де болды. Электр желісі тартылып, жарық келсе кәсібін дөңгелентіп отырған жандардың ісі алға басар еді, – дейді Ақши ауылының тұрғыны Клара Сауытбаева.
Айдар ҚАЛИЕВ
