ҚР ҰҚК Шекара қызметінің Жетісу облысы бойынша департаментіне қарасты Алакөл ауданы шекара басқармасының Кәсіптік-техникалық оқыту бөлімінде жас сарбаздардың қатысуымен 50 шақырымдық оқу-жаттығу көлік шеруі ұйымдастырылды.
Бұл шара шекара қызметкерлерінің кәсіби даярлығы аясында өткізіліп, жас сарбаздардың көлік жүргізу машықтарын жетілдіру, шыдамдылықты арттыру және қиын жағдайларда жедел шешім қабылдай білу қабілетін дамыту мақсатында жүзеге асырылды.
Шеру барысында сарбаздар әскери көлікпен әртүрлі жер бедерінен тұратын бағыт бойымен қозғалып, командалық тәртіпті, техникалық дайындықты және жолда жүру ережелерін сақтау деңгейін көрсетті. Жаттығу шынайы жағдайларға барынша жақын жағдайларда өтті, қатысушылар нақты тапсырмалар алып, әрқайсысынан жоғары жауапкершілік талап етілді.
Қозғалыс кезінде қауіпсіздік ережелерін сақтау – негізгі басымдықтардың бірі болды. Жаттығу жас сарбаздарға төтенше жағдайда шешім қабылдау, күрделі бағытта көлік жүргізу және әскери дайындықтарын тәжірибе жүзінде сынауға мүмкіндік берді.
Бұл шеру кәсіби машықты арттырумен қатар, жас шекарашыларды нағыз қызметке дайындаудың тиімді әдістерінің бірі ретінде бағаланды.
ҚР ҰҚК Шекара қызметі Жетісу облысы бойынша департаменті
