Жаратушы қыз баласын ерекше сұлу қылып жаратқан. Бірақ нәзік жандылар өз табиғи сұлулығын одан да әдемі қыламын деп көбі табиғи ажарын құртып, жасанды әсемдікке бет бұруда.
Ұзын кірпіксіз, қасы жасалмаған қыздарды кездестіру әсте оңай болмай кетті. Барлығының ойында «ерінді өсірмесем, бетті тартқызбасам түрім онша емес» деген түсінік қалыптасқан. Алайда ине мен түрлі дәріні қабылдау, ота жасату адамға қандай қауіп төндіретінін біле бермейтіні өкіндіреді.
Сұлу болып көріну үшін артық қыламын деп тыртық қылғандар баршылық. Мәселен, сұлулық салонында 39 жастағы әйелдің бетіне екпе салған. Дәрі кері әсер беріп, сол жерде жан тапсырады. Осындай көптеген жағдайды біле тұра көрікті болып көріну үшін адам не істемейді десеңізші?! Қыруар ақшасын шашып бетіне түрлі өзгеріс жасайды. Сол үшін тәуекелге барып бетке түрлі блефаропластика, ерінге ботекс, қасқа перманент жасатып және бетін тартқызу секілді тағы басқа келбетіне өзгеріс жасатқандар тым көп.
Қазіргі таңда пластикалық отаның ішінде кең тарағаны блефаропластика. Одан кейін smas-лифтинг. Блефаропластика дегеніміз қабақтың сыртқы көрінісін өзгерту. Адамның жасы келгенде қабағы салбырап түсіп кетеді. Соны көтеру үшін істеледі. Бірақ оны үлкен жастағы кісілер ғана емес, қазір көзінің үстінде сызығы жоқ нәзік жандылардың барлығы жасалуда. Ал келесі smas-лифтинг 35 жастан асқан әйелдер арасында кең тараған. Ол бет пен мойынның әжімдерін кетіру үшін іске асатын операция түрі. Әрине, әйелдердің әдемілікке деген құштарлығында тұрған ештеңе жоқ. Ертеңін ойламай пластикалық хирургтарға барады. Кейін уақыт өте келе өкініп жатады. Бірақ ол кезде тым кеш болып, бұл олқылықтың орнын ешқашан толтыра алмайды.
Зарина БЫЖЫБЕК,
ЖУ студенті
