Қарқара ауылдық өңірі – ежелден картоптың мекені. Елді мекеннің картобына деген сұраныс та жаман емес.
– Ауылдық округ бойынша биылғы жылы 450 гектар жерге картоп отырғызылған. Оның әр гектарынан орташа 150 центнерден жоғары өнім алсақ деген жоспарымыз бар, – дейді ауылдық округ әкімі Болат Молдабаев.
Таулы өлкенің дарқан дақылын өсіруде «Қарқара өнімдері» ЖШС-нің үлес салмағы жоғары. Биыл олар 120 гектар алқапқа картоп өсірді. Аталған серіктестік Оңтүстік Кореядан суперэлиталық «Санта» тұқымын әкеліп, 30 гектар жерге отырғызды. Алдағы жылы округ тұрғындары да берері көп тұқымнан отырғызып, жағдайларын жақсарта түспек.
«Айбол» атты шаруа қожалығының 5 гектар алқабында картоп біркелкі көтеріліп келеді. Гүлдеп тұр. Кезекті суғару жұмысы жүргізілуде. Голландияның берері көп сортты тұқымы отырғызылған алқаптан жоспардағыдай өнім алынары анық. Қожалық жетекшісі Ізтілек Нүсіпқожаев:
– Картоптан бөлек 15 гектар арпа өсіп келеді. Алға қойған мақсат-жоспарларым жоғары. Көпжылдық шөп, жаздық арпа, күздік бидай өсіріп, оның берері көп жаңа сортты тұқымын әзірлеп, ауданның шаруа қожалықтарын қамтамасыз еткім келеді. Сол үшін 40 гектар жер сұрадым. Енді аудан басшылығының жауабын күтіп отырмын, – дейді.
Әрине, өңір үшін үлкен жұмыс жасап отырған азаматтар еңбегі бағаланары сөзсіз.
Қ. САТЫБАЛДЫ
