Қызылтоған орта мектебі бүгінгі уақыт талабына сай жас ұрпаққа білім беріп жатқан оқу ошағы. Мектепке қарасты шағын орталықта да бүлдіршіндер тәрбиеленіп, білімнің алғашқы негіздерін бойларына қалауда.
Биылғы оқу жылында пандемия және карантин жағдайына байланысты оқушылар әртүрлі форматта оқып, қашықтан, кезекші сынып, штаттық режимде білім алды. Осы орайда мектеп директоры Нұржігіт Қайыржановқа жолығып, беріліп жатқан білім сапасы туралы сұраған едік.
– Білім сапасын арттыру, балалардың оқу жылында меңгере алмаған кейбір тақырыптарын пысықтау мақсатында ҚР Білім және ғылым министрлігінің шешімімен жазғы мектеп ұйымдастырылуда. Бұл жағдай үлгерімі төмен оқушылардың деңгейін көтеруге, олқылықтың орнын толтыруға игі ықпал етеді деп білеміз. Жазғы мектеп 26 мамыр мен 19 маусым аралығын қамтиды. Жазғы мектепте білім алу ата-аналардың өтініштері бойынша жүзеге асуда. Бұл орайда білімнің маңызын бірінші орынға қоятын ата-аналарымыз балаларын еш қарсылықсыз жазғы мектепке жіберуде. Шәкірттеріміздің талпынысы мен ынтасын көрген біздер білім беруге білек сыбана кірісіп кеттік. «Жаста оқыған оқуың – тасқа жазғанмен бірдей, егде тартқанда оқыған оқуың – мұзға жазғанмен бірдей» демекші, шәкірттерімізге жазғы мектептің пайдасы мен мүмкіндіктері туралы күнделікті айтып отырамыз, – деді мектеп басшысы.
Жазғы мектеп білім берудегі олқылықтардың орнын толтырып қана қоймай, оқушылардың бос уақытын тиімді өткізуіне мүмкіндік ашуда. Балалар бір уақыт ұстаздарымен, сыныптастарымен жүздесіп, мектептің, мұнда берілетін білімнің қаншалықты маңызды екенін сезінуде. Елімізді жайлаған індет жойылып, балаларымыз еш алаңсыз мектепке баратын күн туса, нұр үстіне нұр болмақ.
Боранбай ЕРҚАЛЫМҰЛЫ
Көксу ауданы
