Бұл баяғыдан айтып келе жатқан мәселе еді. Инвестиция құямын деп уәдесін үйіп-төгіп, кейін жер алып, оны пайдаланбай жатқандар қаншама? Нәтижесінде ауыл адамдары қорлық көруде. Мал жаятын жер жоқ, ал бос тұрғандарды ала алмай әлек. Енді, мінекей, барлық өтінішті автоматты түрде іріктеп, жер алуға өтініш білдіргендердің нақты қаражаты бар ма, жоқ па соны сандық жүйе анықтайтын болады. Жемқорлықты жоюдың жолы осы ғана.
Жолдауда былтырдан бері қайтарылып алынған 13 миллион гектар жердің 8 миллионы ғана берілгені де тілге тиек болды. Үкіметтің осы бағыттағы жұмысын сынға алған Президент тапсырманы соңына дейін орындауға уақыт өлшемін кесіп, тез іске асыру керек екендігін талап етті. Жер ала алмай жүргендер болса дереу әкімдікке барып өтініш қалдыруға асығыңыздар. Жолдаудың осы тарауы тезірек орындалса өтінішіңіз қабылданып, ауыл шаруашылығымен айналысуға мүмкіндік аласыз.
Жалпы, Жолдаудың айтар тұсы көп. Жасанды интеллект қадамын қарыштап жасап жатқанда, бұл салада кенжелеп жүрген Қазақстанға қиын болары анық. Әлемде көптеген маман иесі жұмыссыздыққа тап болды. Программистер демей-ақ қояйын, тіпті, композитор мен актерлердің өзі далада қалудың алдында тұр. Бұл қауіп-қатер бізді сырт айналып өтеді деп отыра берудің қажеті шамалы. Қазірден бастап барлық саланы жаңа сандық платформаға салып, өмірге басқаша қарауымыз қажет. Кім білсін Заң мен Кодекстердің аз-көптігіне де ревизия жасау барысында жасанды интеллект талай тың дүниеге көзімізді жеткізер. Заманның ығына жығылуға мәжбүрміз.
Қасым-Жомарт Кемелұлы озық технологияларды көзбен көрген соң, бейқамдық таныта берсек басқа мемлекеттердің шаңына да ілесе алмайтынымызды түсініп отыр. Сондықтан да жаңа дәуірге жетелеудің амалын ұсынды. Толық қолдаймын!
Ал енді Сенат пен Мәжілістің қосылу мүмкіндігі туралы да айта кетейін. Дәл қазір халықтың көзі ашық, көкірегі ояу. Үлкен реформалардың жалғасы ретінде Президенттің енгізген осы ұсынысын сіздер мен біздер кеңінен талқылайтын боламыз. Бастысы, ел тыныш, жұрт аман болсын. Біз көшпенділердің ұрпағымыз. Табиғат пен ауа райының өзгеруіне тез бейімделетін елміз. Әлемдік саясат пен экономикада саналуан өзгеріс орын алып жатқанда несіне қарап отырамыз? Өзгерейік!
Анас БАҚҚОЖАЕВ
ҚР Парламенті Мәжілісінің депутаты
