Жетісу облысында қоғамдық тәртіп пен қауіпсіздікті сақтауға белсенді атсалысқан азаматтар арнайы марапатқа ие болды.
Облыстық полиция департаментінде өткен марапаттау рәсімінде құқық бұзушылықтардың алдын алуға, қылмыстарды әшкерелеуге және із-түзсіз жоғалған адамдарды табуға көмектескен азаматтарға алғыс хаттар мен естелік сыйлықтар табысталды.
Шара барысында департамент басшылығы қоғаммен тығыз қарым-қатынастың маңыздылығына тоқталып, азаматтардың қырағылығы мен белсенді азаматтық ұстанымы қоғамдық қауіпсіздікті қамтамасыз етудегі маңызды фактор екенін атап өтті.
— Қоғамдық қауіпсіздік – бәрімізге ортақ міндет. Қоғамдық тәртіпке бейжай қарамай, өз үлесін қосып жүрген әрбір азамат – өңір тыныштығының берік тірегі, — деп атап өтті полиция өкілдері.
Мұндай іс-шаралар тек азаматтардың еңбегін бағалап қана қоймай, сонымен қатар полиция мен қоғам арасындағы өзара сенімді нығайтуға бағытталған. Жыл сайын заңдылық пен тәртіпке жаны ашитын белсенді азаматтардың қатары артып келе жатқаны – өңірде құқықтық мәдениет пен азаматтық жауапкершіліктің артып келе жатқанын айқын көрсетеді.
«Жетісу-Ақпарат»
