Жыл басынан бері өңірде 86 жол-көлік оқиғасы тіркеліп, соның салдарынан 25 адам көз жұмып, 153 азамат түрлі деңгейде жарақат алды. Бұл көрсеткіштер өткен жылдың сәйкес кезеңімен салыстырғанда апат санының 43 пайызға артқанын көрсетеді.
Апаттардың басым бөлігі республикалық маңызы бар жолдарда – әсіресе «Алматы – Өскемен» және «Алматы – Хоргос» бағыттарында тіркелген. Бұл жол учаскелері – бүгінде ең апаттық аймақтар ретінде белгіленді.
Апаттардың алдын алу және бақылауды күшейту мақсатында облыс жолдарында дрондармен әуе патрульдеу жұмыстары белсенді жүргізілуде. Жыл басынан бері дрондардың көмегімен жол қозғалысы ережелерін өрескел бұзу фактілері, соның ішінде қарсы жолаққа шығу бойынша 59 құқық бұзушылық анықталды.
Апаттардың тағы бір алаңдатарлық себебі – жүргізушілердің мас күйінде көлік басқаруы. Жарты жыл ішінде облыс бойынша 114 жүргізуші алкогольдік масаң күйде рөлге отырғаны үшін ұсталды. Осыған байланысты рейдтік шаралар күшейтіліп, кешкі және түнгі уақыттарда бақылау жұмыстары тұрақты түрде жүргізілуде.
«Жолдағы тәртіпті сақтау – тек жүргізушілерге емес, бақылаушы органдарға да үлкен жауапкершілік жүктейді. Қазірдің өзінде дрондардың тиімділігі дәлелденіп отыр. Олар қауіпті учаскелердегі ахуалды қадағалап, заң бұзушылықтарды нақты тіркеп келеді», – дейді облыстық Полиция департаментінің өкілі.
Бұдан бөлек, жол қауіпсіздігін арттыру үшін өңірде бірқатар шаралар қолға алынған:
- 9 қызметтік автокөлікке «Ekin-Patrol» автоматты тіркеу жүйесі орнатылып, жылдамдықты өлшеу және тіркеу жұмыстары жолға қойылған;
- Күн сайын жол-патрульдік полицияның қосымша нарядтары облыс аумағында қызмет атқаруда;
- Жыл басынан бері «Қауіпсіз жол», «Мас жүргізуші», «Абайлаңыз, балалар» сынды 6 профилактикалық іс-шара ұйымдастырылып, түсіндіру жұмыстары жүргізілген.
Сонымен қатар, рейдтік іс-шаралар мен алдын алу жұмыстары демалыс күндері қарқынды түрде жалғасуда. Жол ережесін өрескел бұзған жүргізушілерге қатысты заң аясында шаралар қолданылуда.
Фото: kursiv.media
