Жетісу облысында «Онлайн бюджеттік мониторинг» жүйесінің көмегімен бірқатар қаржылық заңбұзушылықтар анықталып, мақсатсыз жұмсалған қаражат толығымен мемлекеттік бюджетке қайтарылды.
Жетісу облысы бойынша ішкі мемлекеттік аудит департаменті 2024 жылдан бастап бюджеттің мақсатты жұмсалуын қадағалау үшін осы модульді тұрақты түрде қолданып келеді. Мониторинг барысында білім беру, денсаулық сақтау, мәдениет және спорт салаларындағы қызметкерлердің жалақысына бөлінген қаражатқа ерекше назар аударылады.
Нәтижесінде:
-
Білім беру саласы бойынша – 393,7 млн теңгеге,
-
Денсаулық сақтау саласы бойынша – 38,6 млн теңгеге,
-
Мәдениет және спорт саласы бойынша – 42,6 млн теңгеге.
Барлығы 474,9 млн теңгеге заң бұзушылықтар анықталып, тиісті хабарламалар жолданды. Бұл қаражат толығымен бюджетке қайтарылған.
Анықталған тәуекелдер бойынша жауапты мекемелерге ескертулер жолданып, уақтылы шаралар қабылданған. Сондай-ақ, бұл ақпараттар Сыбайлас жемқорлыққа қарсы қызмет пен оның аумақтық бөлімшелеріне де жіберіліп отыр.
«Онлайн бюджеттік мониторинг» модулі қаржылық тәуекелдерді жедел анықтап, тиімді алдын алу тетігі ретінде өз тиімділігін дәлелдеді. Департамент алдағы уақытта да бюджеттік тәуекелдерді басқару мен алдын алу шараларын күшейтуді жалғастырады.
«Жетісу-Ақпарат»
