Наурызнама мерекесі аясында өңірде «Тазару күні» кең көлемде аталып өтуде. Осыған орай, Жетісу облыстық психикалық денсаулық орталығында ағаш отырғызу акциясы ұйымдастырылды.
Бұл күні ұйым қызметкерлері 6 жеміс ағашы мен 6 қарағай көшетін отырғызды. Әр адам бұл іске өз үлесін қосты – бірі жер қазып, бірі көшетті баптап, енді бірі оны суарды. Бұл жай ғана жұмыс емес, бірліктің және болашаққа деген қамқорлықтың белгісі болды.
— Өткен жылы да біз дәл осындай акция өткіздік, бүгінде ол көшеттер жайқалып, көз қуантады. Ал бүгін отырғызылған ағаштар – жаңа бастама. Оларға күтім жасап, бірнеше жылдан кейін саялы ағаштарға айналуына атсалысамыз, — деді Жетісу облыстық психикалық денсаулық орталығының директоры Самат Шаймерден.
Мұндай игі дәстүрлер адамдарды біріктіріп, табиғатқа ұқыпты қарауға үйретеді. Орталық қызметкерлері әр отырғызылған ағаш – экологияға қосылған үлес қана емес, уақыт өте тамырын тереңге жіберетін өмір символы деп санайды.
