Жетісу облысында нашақорлық пен есірткі бизнесінің алдын алу және оған қарсы іс-қимыл жөніндегі өңірлік ведомствоаралық штабтың бірінші отырысы өтті. Отырысқа облыстық ведомствоаралық комиссия мүшелері, мемлекеттік және жергілікті атқарушы органдардың басшылары, аудан мен қала әкімдерінің орынбасарлары қатысты.
Штаб отырысында 2024 жылғы профилактикалық және ақпараттық түсіндіру жұмыстарының қорытындылары, сондай-ақ 2025 жылдың бірінші тоқсанында атқарылған жұмыстар талқыланды. Наркологиялық қызмет жұмысы сараланып, өңірдегі есірткі ахуалына байланысты бірқатар проблемалық мәселелер қозғалды.
Отырыс барысында нашақорлықтан ең көп зардап шеккен аудандар мен қалалар айқындалып, сол өңірлерде қосымша профилактикалық және жедел іс-шаралар өткізу қажеттілігі атап өтілді. Сонымен қатар, есірткі ахуалының өзгерістеріне тұрақты мониторинг жүргізу мәселесі де қаралды.
Отырыста қоғамдық орындар мен көшелерде есірткіге қарсы әлеуметтік жарнама орналастыру арқылы тұрғындар, әсіресе жастар арасында есірткі иммунитетін қалыптастыруға бағытталған іс-шараларды жергілікті бюджет есебінен қаржыландыру қажеттілігі қозғалды.
Сонымен қатар, балалар мен жасөспірімдерге арналған ақпараттық-түсіндіру жұмыстарын жүргізу, нашақорлықтың алдын алу мақсатында психологтар мен ментор-мамандардың қатысуымен профилактикалық шаралар ұйымдастыру мәселелері талқыланды.
Отырыс қорытындысында 2025 жылдың екінші тоқсанына жоспарланған іс-шаралар нақтыланып, тиісті тапсырмалар берілді. Штаб қызметі алдағы уақытта өңірлік деңгейде үйлестірілген әрі жүйелі жұмыс жүргізуге бағытталатын болады.
«Жетісу-Ақпарат»
