Бұл шара Жетісу облысының табиғатты қорғау полициясы, Балқаш — Алакөл бассейндік балық шаруашылығы инспекциясы, Көліктік бақылау инспекциясы, Орман шаруашылығы және Талдықорған өңіраралық аңшылар мен балықшылар қоғамының өкілдерінің қатысуымен ұйымдастырылды.
Қаратал ауданының Байшегір және Қызылбалық ауылдық округтерінің аумағында өткен шараның басты мақсаты — су айдындары мен аңшылық алқаптардағы балық аулау торлары мен тұрмыстық қалдықтарды тазарту.
Акцияға 80-нен астам адам қатысты. 15 бірлік техника және 20 қайық тартылды. Нәтижесінде, шамамен үш шақырым балық аулау торы мен екі тоннадан астам тұрмыстық қалдық жиналып, арнайы орындарға шығарылды.
Шара барысында ауыл тұрғындарымен кездесу өткізіліп, су айдындарындағы балық аулауға тыйым салу мерзімдері жәнінде ақпарат берілді және табиғатты қорғау заңнамасын сақтаудың маңыздылығы аталды.
Мұндай шаралар табиғатты қоқыстан тазартуға ғана емес, халық арасында қоршаған ортаға жауапты қозқарасты қалыптастыруға да бағытталған.
«Жетісу-Ақпарат»
