ХҚКО операторы жүйеде электрондық құжатты қалыптастырып, сатушы мен сатып алушы оны EGOV mobile қосымшасында сканерлеу арқылы QR-кодпен қол қоя алады. Бұған дейін көлік құралдарын қайта тіркеу кезінде автокөлікті сатып алу-сатудың нотариалды куәландырылған шартын ұсыну қажет болатын. Енді жұмыс әлдеқайда жеңілдетілді.
Бұл сервисті «Азаматтарға арналған үкімет» порталы әзірледі. Мұндай жаңашылдық қызмет алушыларға өте ыңғайлы. Көлік құралдарын тіркеу кезінде сыбайлас жемқорлық әрекеттерін жою мақсатында енгізілген сервистің пайдасы көп. Мәселен, Мемлекеттік корпорацияның, ҚР ІІМ және «ҰАТ» АҚ ақпараттық жүйелерін ықпалдастыру нәтижесінде автокөлікті қайта ресімдеу ашық процеске айналды. Мәмілені тіркеу кезінде қол қоюды қолдан жасау жүзеге аспайды. Ешқандай да адами фактор әсер етпейді.
– Көрсетілетін қызметті алушылар жүгінген кезде Халыққа қызмет көрсету мамандандырылған орталығының қызметкері жүйеге сатушы мен сатып алушы туралы мәліметтерді енгізеді. Тікелей көлік құралы туралы да ақпарат назарға алынады. Содан кейін жүйе автоматты түрде мәміленің электрондық жазбаша формасын дайындап, экранға QR код шығарады. Оны сканерлеп, автокөлікті сатып алушы мен сатушы сатып алу-сату туралы құжатпен танысады. Дайын болған құжатқа ЭЦҚ көмегімен қол қоюға болады, – деп түсіндірді Жетісу облысы бойынша «Азаматтарға арналған үкімет» мемлекеттік корпорациясы» КЕАҚ мамандары.
Осындай процесс EGOV business қосымшасы арқылы ұйымның мүдделерін білдіретін сенімхат пен ЭЦҚ пайдалану құқығы бар заңды тұлғалардың өкілдері үшін қолжетімді. Еске салсақ, осы жылдың 23 сәуірінде ҚР ІІМ көлік құралдарын тіркеу және есепке алу қағидаларына өзгерістер мен толықтырулар енгізудің нәтижесінде автомобильдерді қайта ресімдеу кезіндегі мәміленің қағаз түрінде жазбаша нысанын қабылдау күшін жойды.
Облыс әкімінің
баспасөз хатшысы
