Панфилов ауданы арқылы өтетін республикалық маңызы бар жолдардың жалпы ұзындығы 153 шақырымға тең. Соның Сарыөзек–Көктал бағытындағы 68-110 шақырымына орташа жөндеу жұмыстары жүргізіліп жатыр. Биыл Алматы – Көкпек – Шонжы – Қорғас тасжолының 306-322 шақырымындағы Жаркент қаласы мен Көктал кенті арасындағы 16 шақырымға орташа жөндеу жүргізіліп, үш жерден су өткізетін үлкен құбыр қойылды.
Өңір арқылы өтетін облыстық маңызы бар жолдардың ұзындығы – 197 шақырым. Биыл Жаркент – Лесновка бағытындағы 14,2 шақырым орташа жөнделіп, жеті жердегі су өткізгіш құбырлары және Нәдек-Сүптай ауылдарының аралығындағы 10,4 шақырымға орташа жөндеу жұмыстары жасалып, төрт су жолының құбыры ауыстырылды.
Жаркент өңіріндегі аудандық маңызы бар жолдардың жалпы ұзындығы 531 шақырымды құраса, қазір Қоңырөлең округіндегі Бөрібай би ауылының кіреберіс жолына күрделі жөндеу жұмыстары жасалды. Былтыр бұл жолдың 5,4 шақырымына қиыршық құм төселіп, 4 жеріне көпір салынып, асфальтталып, жақында жалпы жұмысы тиянақталды.
Ал бұған дейін ешқандай жөндеу көрмей, асфальт салынбаған Қоңырөлең ауылдық округіне қарасты Ынталы ауылына апарар жолға алаңдаған тұрғындардың тілегі жақында жүзеге асты. Биыл жергілікті бюджеттен Ынталы ауылының жолына 2 392 263,9 мың теңге бөлініп, Сарыөзек – Жаркент күрежолынан Ынталыға апаратын қара жолға күрделі жөндеу жұмыстары басталды. Жалпы ұзындығы 12 шақырымға жуық бұл жол құрылысы жоспар бойынша келер жылы аяқталуы тиіс.
Биыл жалпы аудандық маңызы бар елді мекендердің көше жолдарын орташа жөндеу жұмыстарына барлығы 275,6 миллион теңге бөлініп, жалпы 8 көше жасалды. Сонымен қатар, алдағы жылы аудан орталығы Жаркент қаласы мен бірнеше ауылдағы аудандық маңызы бар 18 көшеге орташа жөндеу жұмыстарын жүргізу үшін жобалықсметалық құжаттамасын сараптама қорытындысымен бірге дайындауға қаржы қарастырылып, құжаттар жасалуда. Бұдан тыс Жаркент қаласындағы Сыпатаев – Ходжамияров көшелерін күрделі жөндеуге 50 миллион теңге бөлінген. Қазір Сыпатаев көшесінің шығыс бетіне жаяу жүргіншілер соқпағын жасау жұмысы басталды. Осы жоба аясында Тышқан өзенінен өтетін көпір құрылысын салу қарастырылған. Бұл жобаның жалпы құны – 814,7 миллион теңге. Сонымен қатар, Жаркент қаласының көшелеріне 5 бағдаршам орнатуға құжаттама жасауға қаржы қарастырылып, техникалық құжаттар дайындалуда. Жоба аясында аудан орталығындағы Головацкий – Зулиярова, Уәлиханов – Түркебаев, Жібек жолы – Көбіков, Жібек жолы – Абай көшелерінің қиылысына бағдаршам орнатылады.
Заман ағымы елді мекендердің инфрақұрылымын озық үлгіде жасауды талап етеді.
Мырзағали НҰРСЕЙІТ
