Мемлекет басшысы Қасым-Жомарт Тоқаев 1 қыркүйек күнгі Қазақстан халқына Жолдауында ауыл-аймақтардың дамуы маңыздылығы жайында тоқталып өтті. Барлығыңызға мәлім, қазіргі таңда «Ауыл аманаты» бағдарламасы іске асып келеді. Осы ретте Президент «Ауыл-аймақты дамыту үшін шағын шаруашылықтарды қолдау өте маңызды.
«Ауыл аманаты» бағдарламасының елге қажет екені айқын көрінді. Оның келесі кезеңінде жеңілдетілген несие берумен шектеліп қалмау керек. Жеке қосалқы шаруашылық иелері өзара бірігуі қажет. Осыған қажетті жағдай жасалуға тиіс» — деп Жолдауында атап өтті.
Ал біздің Жетісу облысында ауыл халқының табысын арттыруға бағытталған «Ауыл аманаты» жобасын іске асыруға биыл 3 млрд. 202 млн. теңге бөлінді. Жоспар бойынша 581 мкрокредит беріледі, яғни 10 ауыл шаруашылығы кооперативі 297 млн. теңге сомаға қаржыландырылады.
Қазіргі кезеңге 1 674 млн теңгеге 272 өтінім түсіп, бүгінгі күнге 18 өтінім, яғни 91,1 млн теңге мақұлданып, қаржыландырылған. Бұдан бөлек, кәсіпкерлікті дамыту жөніндегі ұлттық жоба шеңберінде әлеуметтік осал топтарына гранттарды беру үшін биыл 811,4 млн тенге сомасына 588 грант беру жоспарланған. Бүгінгі күнге 219 азаматқа грант берілді.
Осындай мемлекеттің қамқорлығының арқасында талай ауылдармен аудандар өркендеп, ауыл шаруашылығының жаңа қадамға жылжуына өз септігін тигізеді. Ең бастысы бағдарламаға қатысам дегендерге ниет, талапқа сәйкес құжаттары болса, бағдарламаның жемісін, игілігін ауыл тұрғындары көрмек деген сенімдемін.
Қанат Темірғалиұлы,
Жетісу облыстық мәслихат депутаты
Ескірген техникамен ауыл шаруашылығын өркенде алмаймыз!
Өздеріңізге мәлім, елімізде шаруаға керекті техниканың басым бөлігі тозып ескірген, ал шаруаларға жаңасын алудың машақаты аз емес. Шаруалардың мәселесін мемлекет деңгейінде де көтеріліп, ҚР Президенті Қ.Тоқаев 1 қыркүйек күнгі Қазақстан халқына арнаған Жолдауында атап өтті. Мемлекет басшысы «Машина-трактор паркінің әбден ескіріп, тозуы – күрделі мәселеге айналды. Қазір ауыл шаруашылығы техникасының 80 пайызы тозып тұр.
Сондықтан жыл сайын оның 8-10 пайызын жаңартып отыру қажет. Бұл ретте еліміздегі техника өндірушілер мен шаруалардың да мүддесін ескерген абзал»- деп атап өтті.
Расымен, елдегі ауыл шаруашылығы техникаларының әбден ескіргені жайында «Ауыл» партиясы да үнемі айтып келеді. Мәселен, трактор-комбайн паркін жаңартуға арналған лизингтік бағдарлама әлі де өз деңгейінде емес. Сонымен қатар, агроөнеркәсіптік кешенді техникалық жабдықтау үшін жаңа жағдай жасау аса маңызды болып отыр.
Салыстырмалы түрде алып қарасақ, ескіріп, тозығы жеткен техниканың қуаты әрі кетсе 40 аттың күшін құрайды, ал дамыған елдер, оның ішінде АҚШ-тағы егіс алқаптарында 300, Германияда 500 аттың күші бар ауылшаруашылық техникалары өз міндеттерін мүлтіксіз орындап келеді. Сонда қорытындыласақ, еліміз тозығы жеткен техниканың кесірінен қосымша 20 пайыз өндіріс шығынына ұшырап отыр.
Қазір жаһандық бәсеке күшейіп тұр, тауар нарығында өзгеріс бар. Мұндай жағдайда өнім өткізу саясатына ерекше мән беруіміз керек. Жылдар бойы қалыптасқан ішкі және сыртқы нарықтағы орнымызды сақтап қалу айрықша маңызды. Үкіметтің алдында сыртқа шығарылатын өнім нарығының ауқымын жоспарлы түрде кеңейту міндеті тұр. Қазақстанның тауарларын шетелге таныту және шығару үшін тиісті шаралар қабылдаған жөн». Ендігі үміт, Президентіміздің Жолдауында жыл сайын тозған техниканың 8-10 пайызын жаңартып отыру туралы тапсырмасын іс жүзінде шаруалар көруі. Ол үшін тиісті министрлік мәселені шешу бойынша механизмін қарастыру қажет.
Олжас Жапарқұлов,
Жетісу облыстық мәслихат депутаты
Қаржылық сауаттылық маңызды
Мемлекет басшысы Қасым-Жомарт Тоқаевтың 1 қыркүйектегі Қазақстан халқына Жолдауында азаматтардың қаржылық сауаттылығы жайлы тоқталып өтті.
Президент өз сөзінде: «Бұл ретте «AMANAT» партиясының «Қарызсыз қоғам» жобасын ерекше атап өту қажет. Соның арқасында еліміздің 8 аймағында 20 мыңнан астам адам қаржылық сауатын арттырды. Олардың көпшілігі – 10 және одан да көп несие алған адамдар. Бұл жоба аз уақытта өзінің тиімділігін көрсетті. Үкіметке «AMANAT» партиясымен бірлесіп, оның ауқымын кеңейтуді тапсырамын. «Қарызсыз қоғам» жобасының игілігін бүкіл еліміз көруі қажет» – деп атап өтті.
Расымен «AMANAT» партиясының ауыл тұрғындарының қаржылық сауаттылығын арттыру мақсатында Halyk Bank-пен бірге «Қарызсыз қоғам» жобасы қоғамда өзінің қажетті бастама екенін көрсетіп отыр. Жобаның алғашқы кезеңінде еліміздің Ақтөбе, Алматы, Түркістан, Солтүстік Қазақстан, Батыс Қазақстан, Жамбыл, Атырау және Маңғыстау облыстары қамтылып, азаматтарымыздан жақсы қолдау білдірді.
Бұл жобаның ұйымдастырушыларының оқу-үйрету барысында азаматтарымыз бизнес жоспар құруға, жеке және отбасылық бюджеттің құрастырылуын, қаржылық мақсаттарды дұрыс қою мен оған жету үшін жасалатын қадамдарды үйреніп шықты. Жобаға қатысушылардың 95 пайыздан көбінде банк пен микроқаржы ұйымдарында берешектері бары, олардың нәтижесін талдау барысында бір отбасында 5, 10 тіпті 16 несиеге дейін бар екенін аңғардық. Олар бір кредиттен құтылу үшін келесі қаржыны несиеге алып отырған. Яғни, бұл қоғамда өте өзекті мәселе екенін көрсетіп отыр. Ендігі кезек, партияның жобасы үкімет деңгейінде іске асырылса адамдарға өздерінің кіріс-шығыстарын есептеуге, қаржылық сауатты болуға үйретуге бағытталған игі жоба республиканың барлық ауыл-аймақтарын қамтиды деген сенімдемін.
Жалғас Алтынбеков,
Жетісу облыстық мәслихат депутаты
