Облыста егін жинау науқаны жоспарға сәйкес жүріп жатыр. Келесі жылдың егінін себу, яғни күздік бидай егу жұмыстары басталды. Бүгінгі күні бидай мен арпа толығымен жиналып бітіп, 228 мың гектардан 494,0 мың тонна өнім жиналды. Яғни өнім өткен жылғы көрсеткіштен 110 мың тонна артық алынды. Бұл ретте орташа өнімділік гектарына 22,0 центнерді құрады. Ал 2025 жылы бұл көрсеткіш гектарына 16,4 центнер болған.
Облыстық ауыл шаруашылығы басқармасының мәліметінше, 228 мың гектардың 88,6 мың гектары – бидай, оның 65,6 мың гектары күздік бидай. Ал 137,8 мың гектардан жиналған арпаның 210 гектары күздік арпа. Оған қоса сұлы 1,6 мың гектар жерден орылды. Жиналған астықтың 241,7 мың тоннасы қоймаларға сақталса, 238 мың тоннасы мал азығына сатылды. Аймақта жалпы сыйымдылығы 713,5 мың тонна болатын 486 астық қоймасы бар.
– Дәндік жүгеріні ору жұмыстары Ақсу, Панфилов аудандарында жүргізіліп жатыр. Бүгінгі күнге 1140 гектар орылып, 9,0 мың тонна өнім алынды. Майлы дақылдардың ішінде мақсары, зығыр, майбұршақ шабылуда. Картоп пен көкөністің 67%-ы жиналды. Бақша дақылдарын жинау да қарқынды жүру- де, – деді облыстық ауыл шаруашылығы басқармасының басшысы Нұрдәулет Кененбаев.
Жоспарланған 65,1 мың гектар күздік бидайды себу жұмыстары Ақсу, Ескелді, Көксу, Сарқан аудандарында және Талдықорған қаласында басталып, бүгінге дейін 3,3 мың гектарға күздік бидай себілді. Оған қоса жоспарланған 130,1 мың гектар сүдігердің 12,5 мың гектары көтерілді.
ӨЗ ТІЛШІМІЗ
