Оқушылар сарайында «Әлемнің сыйы – аналарға» атты салтанатты шара өтті.
Жиында облыстық кәсіподақтар орталығының төрағасы Мэлс Төлепбергенов қаладағы мектеп директорларын, мұғалімдер және балабақша тәрбиешілерін білім саласындағы ерен еңбектері үшін құрметке бөлеп, мерейлі мерекемен құттықтады. Қоғамның шамшырағы болған ұлағатты жандарға табыс, еңбектеріне жеміс тіледі. Өз кезегінде облыстық білім басқармасының басшысы Марат Сүлейменов те өз тілегін айтып, айтулы мерекемен құттықтады.
Мереке аясында мұғалімдерге қазақстандық оқу-ағарту, ғылым және жоғары білім қызметкерлерінің салалық кәсіподақ ұйымының Алғыс хаты мен төсбелгісі табыс етілді. Сонымен қатар аталмыш саланың негізгі бағыттары бойынша белсенді жұмыс істеген азаматшаларға аталымдар бойынша Құрмет грамоталары табысталды.
– Бұл марапат мен үшін үлкен құрмет әрі жауапкершілік. Ұстаздық жолымдағы еңбегімнің еленуі – шабыт беріп, әрі болашаққа деген сенімімді нығайтады. Бұл тек менің ғана емес, барлық әріптесімнің ортақ еңбегінің нәтижесі, – дейді Талдықорған жоғары политехникалық колледжінің әдіскері Аяжан Жанбаева.
Ән әуелеп, күй күмбірлеген кеш соңын «Ағайындылар» тобы әсем әнмен түйіндеді.
Мұрат КҮМІСБЕК
ЖУ студенті
