АҚШ-тың Нью-Йорк қаласындағы Біріккен Ұлттар Ұйымының штаб-пәтерінде Экономикалық және әлеуметтік кеңестің (ECOSOC) дәстүрлі жастар форумы өтті. 2026 жылғы 14-16 сәуір аралығында ұйымдастырылған ауқымды жиынға Қазақстан делегациясы белсенді қатысып, елдегі жастар саясатының басымдықтарын таныстырды, – деп хабарлайды 7-su.kz ақпараттық порталы.
Халықаралық деңгейдегі стратегиялық іс-шарада еліміздің атынан ҚР Мәдениет және ақпарат министрлігі Жастар және отбасы істері комитетінің мамандары, «Жастар» ғылыми-зерттеу орталығының өкілдері мен республикалық жастар ұйымдарының көшбасшылары сөз сөйледі. Бұл форум 2030 жылға дейінгі тұрақты даму мақсаттарын ілгерілетуге бағытталған әлемдегі ең маңызды халықаралық алаңдардың бірі саналады. Мұнда әлемнің түкпір-түкпірінен келген жас көшбасшылар жаһандық проблемаларды шешу жолдарын ортаға салды.
Мәдениет және ақпарат министрлігінің баспасөз қызметі бағдарлама аясында жоғары деңгейдегі пленарлық отырыстар, тақырыптық пікір алмасулар мен өңірлік кездесулер ұйымдастырылғанын атап өтті. Кездесулер барысында жастардың қоғам дамуына тигізетін ықпалы, жаңа технологиялық бастамаларды қолдау және мемлекетаралық ынтымақтастықты нығайту мәселелері жан-жақты сөз болды. Қазақстандық делегация елімізде іске асырылып жатқан жастарға арналған әлеуметтік жобалар мен мемлекеттік қолдау шаралары туралы тәжірибе бөлісті.
Қазақстанның аталған жаһандық форумға қатысуы мемлекеттік жастар саясатын халықаралық стандарттарға сай дамытуға мүмкіндік береді. Сонымен қатар, бұл қадам халықаралық озық тәжірибе алмасуға және қазақстандық жастардың әлемдік деңгейдегі бастамаларға белсенді араласуын арттыруға негіз болмақ. Форум қорытындысы бойынша қабылданған ұсыныстар жастардың әлеуметтік-экономикалық жағдайын жақсартуға бағытталған алдағы мемлекеттік бағдарламаларға арқау болады.
