Адамдар өмір сүруге қолайлы, жұмыс істеуге жағдай жасалған дамыған елде тұруды қалайды. CEOWORLD Magazine басылымы жариялаған 2026 жылғы Global Human Prosperity Index (Жаһандық адами әл-ауқат индексі) рейтингі қай елдерде өмір сапасы жоғары екенін анықтады, – деп хабарлайды 7-su.kz ақпараттық порталы Ulysmedia.kz сайтына сілтеме жасап.
Зерттеуге әлемнің 193 мемлекеті қатысты. Индекс тек экономикалық байлықты ғана емес, сол ресурстардың халықтың нақты өмір сүру деңгейіне қалай әсер ететінін бағалайды. Онда өмір сүру ұзақтығы, білім сапасы, жан басына шаққандағы табыс, саяси тұрақтылық және азаматтарға берілетін мүмкіндіктер есепке алынған.
Үздік ондық: Өмір сүруге ең қолайлы елдер
Рейтинг қорытындысы бойынша, «өте жоғары әл-ауқат» санатына енген ТОП-10 елдің қатарына Батыс және Солтүстік Еуропа мемлекеттері мен Азияның жетекші қаржы орталықтары кірді:
-
Швейцария
-
Исландия
-
Австралия
-
Германия
-
Нидерланд
-
Норвегия
-
Швеция
-
Гонконг
-
Дания
-
Сингапур
Сарапшылардың айтуынша, бұл елдер жоғары табыс деңгейімен қатар, тиімді мемлекеттік басқару жүйесімен, тұрақты әлеуметтік саясатымен және азаматтардың өмір сапасын қамтамасыз ететін қолайлы ортамен ерекшеленеді. Сонымен бірге, жұмыс пен жеке өмір арасындағы тепе-теңдік те маңызды фактор ретінде бағаланған.
Мамандар бұл рейтингтің негізгі қорытындысы ретінде жаһандық бәсекенің бағыты өзгергенін атап өтеді. Яғни, мемлекеттер үшін енді тек экономикалық өсім емес, оның сапасы маңызды. Бұл — халықтың өмір сүру ұзақтығы, білім деңгейі, мүмкіндіктердің қолжетімділігі және жалпы тұрақтылық арқылы өлшенетін көрсеткіштер.
ҚАЗАҚСТАН НЕШІНШІ ОРЫНДА?
Тізімде Қазақстан 58-орынға тұрақтады. Елдің индекс көрсеткіші – 79,53 балл, ал санаты – «өте жоғары әл-ауқат».
Бұл – алдыңғы нәтижемен салыстырғанда төмендеу. 2024 жылы Қазақстан 49-орында болған еді . Осылайша, екі жыл ішінде ел рейтингі шамамен 9 позицияға төмендеген.
Сарапшылардың бағалауынша, Қазақстан Орталық Азия өңірінде әлі де жетекші позициясын сақтап отыр. Дегенмен жаһандық рейтингтегі орынның төмендеуі елдегі әл-ауқат өсімі мен оның халық өміріне әсері арасындағы теңгерім әлі толық қалыптаспағанын көрсетеді.
Жалпы алғанда, Қазақстан «өте жоғары әл-ауқат» тобына енгенімен, үздік елдер қатарына жақындау үшін әлеуметтік даму, институционалдық сапа және өмір сапасын арттыру бағытында қосымша ілгерілеу қажет.
Ал рейтингте көршілеріміз Өзбекстан 104, Қырығызстан 110, Қытай 72, Ресей 60 орында тұр.
