Жиһанкез Сәрсенбай Қотырашов «Құрметті спорт қызметкері» атағымен марапатталды. Марапатты Туризм және спорт министрінің орынбасары Серік Жарасбаев табыстады, – деп хабарлайды 7-su.kz ақпарттық порталы.
Сәрсенбай Қотырашов – табандылық пен төзімнің жарқын үлгісі. Ол 2022 жылы, 72 жасында, Қазақстанның 17 облысын жаяу аралап, 8 мың шақырым жолды еңсерген. Бұл жетістігі үшін саяхатшы отандық рекордтар кітабына енген.
Жиһанкез қария мұнымен тоқтап қалған жоқ. 2023 жылы Атыраудан басталған сапарында Кавказ өңірі мен Грузия арқылы Түркияның Стамбұл қаласына дейін жаяу жетті. Ал 2024 жылы Өскеменнен шығып, Алтай мен Моңғолияны басып өтіп, Қытай астанасы Бейжіңге дейін барған.
2026 жылғы 3 наурызда басталған кезекті сапары да ауқымды болды. 76 жастағы саяхатшы Сербия, Мажарстан, Аустрия, Германия және Франция елдерін жаяу жүріп өтіп, жуырда елге оралды.
Қажымас қайратымен көпке үлгі болған қария енді өзінің жаяу жүріп өткен ұзақ сапарларын халықаралық деңгейде дәлелдеп, әлемдік рекордтар қатарына қосуды мақсат етіп отыр.
