Қазақстанда бірыңғай QR-код қашан іске қосылады

Қазақстанда түрлі банк арасындағы төлемдерге арналған бірыңғай QR-код жүйесін іске қосу мерзімі нақтыланды. Бұл туралы Ұлттық банк төрағасы Тимур Сүлейменов мәлімдеді, – деп хабарлайды 7-su.kz ақпараттық порталы Tengrinews.kz сайтына сілтеме жасап.

Ұлттық банкте өткен брифинг барысында журналистер қазақстандық банктердің бірыңғай QR-кодты енгізу мерзімінің не себепті ұзарып жатқанын және оның қашан іске қосылатынын сұрады.

Тимур Сүлейменовтің айтуынша, қазіргі таңда барлық екінші деңгейлі банк қажетті құжаттарға қол қойған. Ендігі кезеңде жүйені толық іске қосу үшін техникалық мәселелерді реттеу жұмыстары жүргізіліп жатыр.

Ұлттық банк басшысы бұл процестің созылуын банктердің қауіпсіздік талаптарымен байланыстырды. Оның сөзінше, қаржы ұйымдары өз экожүйелерінде QR-төлемдердің қауіпсіздігін қамтамасыз ету үшін айтарлықтай инвестиция салған. Сондықтан әртүрлі банктің жүйелері бір-бірімен қауіпсіз әрі үйлесімді жұмыс істеуі үшін қосымша уақыт қажет.

– Бұл мәселе жан-жақты зерделенді. Қазіргі таңда арнайы команда осы бағытта жұмыс істеп жатыр. Банктер енгізген технологиялардың барлығы қауіпсіздік талаптарына сай келіп, бір жүйеде дұрыс жұмыс істеуі тиіс. Бұл белгілі бір уақытты талап етеді, – деді Тимур Сүлейменов.

Оның мәліметінше, бірыңғай QR-код жүйесі 2026 жылдың шілде айында іске қосылуы мүмкін. Сонымен қатар, жобаның бұдан да ертерек жүзеге асу ықтималдығы бар.

Айта кетейік, бұған дейін Ұлттық банк бірыңғай QR-код жүйесін 2026 жылдың бірінші тоқсанының соңына дейін толық іске қосу жоспарланғанын хабарлаған болатын.