2026 жылғы сәуір айында Қазақстанда айлық инфляция 0,8% деңгейінде қалыптасты. Баға өсімі барлық негізгі санаттар бойынша байқалды: азық-түлік тауарлары – 0,7%, азық-түлік емес тауарлар мен ақылы қызметтер – 0,9%.
Азық-түлік нарығында жекелеген өнімдер арзандады. Атап айтқанда, банандар мен апельсиндер – 3%-ға, көк шөп пен үрме бұршақ – 0,6%-ға, зефир – 0,5%-ға, кептірілген өрік – 0,4%-ға төмендеген. Сонымен қатар бірқатар тауарлар қымбаттады: жүзім – 5,6%, сарымай мен карамель – 1,2%, картоп – 0,8%, сүзбе – 0,6%, нан-тоқаш өнімдері – 0,4%, лимон мен жасымық – 0,3%.
Азық-түлік емес тауарлар сегментінде де әркелкі өзгерістер тіркелді. Кір жуғыш машиналар – 1,2%-ға, парацетамол – 0,8%-ға, контактілі линза ерітінділері – 0,7%-ға, блендер – 0,6%-ға арзандады. Ал қол сағаттары – 4%-ға, цемент – 2,4%-ға, жеке гигиена құралдары – 1,5%-ға, жуғыш және тазартқыш құралдар – 0,7%-ға қымбаттады.
Қызмет көрсету саласында туристерге арналған медициналық сақтандыру құны 1,9%-ға төмендеген. Керісінше, клининг қызметтері – 0,8%-ға, косметологиялық қызметтер – 0,7%-ға, компьютер мен ноутбук жөндеу – 0,3%-ға өсті.
Жылдық есепте 2026 жылғы сәуірде инфляция 10,6% құрап, наурыз айымен салыстырғанда 0,4 пайыздық тармаққа баяулаған. Бұл ретте азық-түлік емес тауарлар бағасы – 11,7%, азық-түлік – 11,3%, ақылы қызметтер – 8,9% өскен.
Жылдық динамикада азық-түлік бағалары ішінде қырыққабат – 24,4%-ға, сарымсақ – 7,8%-ға, қызылша – 4,7%-ға арзандаған. Банандар да 1,7%-ға төмендеген. Ал алмұрт – 10,8%-ға, бал – 9,1%-ға, мармелад – 7,6%-ға, ашытқы – 7%-ға, қант – 4,2%-ға қымбаттаған.
Бір жыл ішінде тұрмыстық тауарлар арасында үтік – 20,7%-ға, тіс пастасы – 14,6%-ға, зарядтау құрылғылары – 6,8%-ға, дастарқан – 6,4%-ға, асүй пышағы – 2,5%-ға өскен. Қызмет көрсету секторында заңгерлік қызметтер – 10%-ға, байланыс қызметтері – 3,2%-ға қымбаттаған.
Инфляция деңгейін сипаттайтын тұтыну бағалары индексі ай сайын есептеледі. Баға мониторингі 537 түрлі тауар мен қызмет түрін қамтиды. Динамикалық өзгерістер 2018 жылдан бергі деректер негізінде арнайы интерактивті дашборд арқылы бақыланады.
Дереккөз: aikyn.kz
