23 сәуірде Қазақстанда Мемлекет басшысы Қасым-Жомарт Тоқаевтың бастамасымен бекітілген Ұлттық кітап күні атап өтіледі. Осыған орай елдің барлық өңірінде кітап оқу мәдениетін арттыруға және зияткерлік әлеуетті дамытуға бағытталған кітап апталығы ұйымдастырылып жатыр, – деп хабарлайды 7-su.kz ақпараттық порталы.
Апталық аясында 1500-ден астам іс-шара өткізу жоспарланған. Бағдарлама бірнеше тақырыптық күндерді қамтиды:
16 сәуір – «Артық білім кітапта…»
17 сәуір – «Сөз өнеріндегі өлкетану»
18 сәуір – «Кітапхана түні» акциясы
19–20 сәуір – «Weekend. Book. Vibes»
21 сәуір – «Кітап. Тарих. Шежіре»
22 сәуір – «Кітап – достық амбассадоры»
23 сәуір – Ұлттық кітап күні
Бүгінгі күн «Артық білім кітапта…» тақырыбымен өтуде. Бұл күн кітаптың оқу мен ағартудың, рухани дамудың қайнар көзі ретіндегі маңызын айқындауға бағытталған.
Осы орайда елімізде кітап фестивальдері, ашық есік күндері, жәрмеңкелер, кітап оқу марафондары ұйымдастырылып жатыр. Сонымен қатар баспалар мен кітап дүкендері бірлесіп түрлі мәдени іс-шаралар өткізуде.
Кітапханаларда келушілер үшін тақырыптық көрмелер, таныстырылымдар мен арнайы бағдарламалар ұсынылуда. Мұндай бастамалар қоғамда кітапқа деген қызығушылықты арттырып, оның маңызын кеңінен насихаттауға бағытталған.
