2025 жылғы 2–5 маусым аралығында Қазақстан Республикасы Қарулы Күштерін дайындау жоспарына сәйкес еліміздің бірнеше өңірінде әскери бөлімдер мен құрамалардың жауынгерлік әзірлігіне тексеру жүргізіледі, деп хабарлады Қорғаныс министрлігі.
Тактикалық-саптық жаттығулар шеңберінде бөлімшелер дабыл бойынша көтеріледі, тұрақты орналасу пункттерінен оқу-жаттығу аудандарына, полигондар мен оқу орталықтарына әскери техниканың колонналары қозғалады.
Жаттығулар оқу мақсатында ұйымдастырылған. Негізгі міндет — әскери бөлімдердің жауынгерлік әзірлігін арттыру, жеке құрамның үйлесімді іс-қимылын қалыптастыру және командирлердің басқару дағдыларын дамыту.
Әскери техника қозғалысы бекітілген бағыттар бойынша, қауіпсіздік талаптарын қатаң сақтау арқылы жүзеге асады.
Қорғаныс министрлігі азаматтарды сабыр сақтауға, аталған шараларға түсіністікпен қарауға және расталмаған ақпарат таратпауға шақырады.
